Presidenti i Türkiyes, Recep Tayyip Erdoğan, të martën u takua me kryeministrin e Bangladeshit, Tarique Rahman, në margjinat e COP31, Konferencës së OKB-së për Ndryshimet Klimatike, të cilën Türkiye po e organizon këtë vit në qytetin jugor të Antalyas.
Takimi u përqendrua në marrëdhëniet mes Türkiyes dhe Bangladeshit, si dhe në çështjet rajonale, njoftoi Drejtoria e Komunikimeve e Türkiyes.
Erdoğan tha se Türkiye dhe Bangladeshi do të përfitojnë nga vazhdimi i ndërmarrjes së hapave për zgjerimin e bashkëpunimit në fusha të ndryshme, veçanërisht në tregti dhe industrinë e mbrojtjes.
Presidenti turk tha gjithashtu se Ankaraja po i vazhdon përpjekjet për të siguruar që situata humanitare në Cox’s Bazar të mbetet në vëmendjen e komunitetit ndërkombëtar, duke iu referuar rreth një milion refugjatëve Rohingya që ndodhen në kampet e refugjatëve atje.
Duke theksuar se Bangladeshi po i ndien nga afër pasojat e ndryshimeve klimatike, Erdoğan tha se adresimi i nevojave të vendit për projekte në fusha si menaxhimi i përmbytjeve dhe infrastruktura rezistente ndaj ndryshimeve klimatike është ndër temat kryesore të konferencës COP31.
Ai shtoi se Türkiye pret që nisma e saj “Ura për Zbatimin e Klimës” të ndihmojë në zgjidhjen e këtyre sfidave.
Në takim morën pjesë edhe ministri i Jashtëm, Hakan Fidan, si dhe Akif Cagatay Kilic, këshilltari kryesor i presidentit për politikën e jashtme dhe sigurinë.
– Emine Erdoğan takohet me bashkëshorten e kryeministrit të Bangladeshit
Ndërkohë, zonja e parë e Türkiyes, Emine Erdoğan, bashkëshortja e presidentit, u takua me homologen e saj nga Bangladeshi, Zubaida Rahman, bashkëshorten e kryeministrit, në kuadër të konferencës COP31.
Pas takimit, Emine Erdoğan shkroi në platformën sociale turke NSosyal se ato “diskutuan rëndësinë e bashkëpunimit global për avancimin e drejtësisë klimatike, zhvillimit të qëndrueshëm dhe objektivave të Nismës Zero Mbetje”.
Zonja e parë turke ka udhëhequr përpjekjet për zero mbetje si në Türkiye, ashtu edhe në Kombet e Bashkuara.
Në takim mori pjesë edhe Samed Agirbas, president i Fondacionit për Zero Mbetje dhe Kampion i Klimës i COP31.
