Ministri për Evropën dhe Punët e Jashtme i Shqipërisë, Ferit Hoxha, ka deklaruar se Shqipëria është e vendosur ta luajë rolin e saj përkrah ShBA-së dhe partnerëve të tjerë ndërkombëtarë në mbështetjen e përpjekjeve për paqe të qëndrueshme në Lindjen e Mesme.

Hoxha ka pritur sot në Tiranë komandantin e Forcës Ndërkombëtare për Stabilizimin e Gazës, Gjeneral Major Jasper Jeffers, ndërsa në një reagim në rrjetet sociale kryediplomati shqiptar e ka konsideruar takimin si të dobishëm.

"Diskutuam rëndësinë e pjesëmarrjes së Shqipërisë në Forcën Ndërkombëtare për Stabilizimin, e cila përkthehet në një kontribut të prekshëm në terren, një nga komponentët kryesorë të politikës sonë të jashtme: avancimin e paqes dhe sigurisë dhe gatishmërinë për të kontribuar aty ku përpjekjet ndërkombëtare mund të bëjnë një ndryshim", është shprehur Hoxha.

Hoxha ka shtuar se si anëtare themeluese e Bordit të Paqes, Shqipëria është e vendosur të luajë rolin e saj përkrah ShBA-së dhe partnerëve të tjerë ndërkombëtarë "në mbështetjen e përpjekjeve për të krijuar kushtet për siguri, stabilitet dhe paqe të qëndrueshme në Lindjen e Mesme".

"Pjesëmarrja jonë në ISF (International Stabilization Force) pasqyron gatishmërinë e Shqipërisë për të kontribuar konkretisht në një iniciativë që synon ruajtjen e sigurisë dhe dinjitetit të popullit të Gazës, lehtësimin e ndihmës humanitare dhe rindërtimin, dhe ndihmën në krijimin e kushteve për një horizont politik të besueshëm dhe të qëndrueshëm dhe një jetë më të mirë për të gjithë", tha ai.

Duke theksuar se Shqipëria ka demonstruar vazhdimisht angazhimin e saj për paqen dhe sigurinë ndërkombëtare, përmes NATO-s, Kombeve të Bashkuara dhe misioneve të tjera ndërkombëtare, ai shtoi se "Kontributi ynë në ISF është një vazhdim i natyrshëm i këtij angazhimi dhe i besimit tonë se vendet, pavarësisht nga madhësia e tyre, mund të japin kontribute domethënëse në adresimin e sfidave të kohës sonë".

Kryediplomati Hoxha ka theksuar se janë të gatshëm të bëjnë pjesën e tyre, sipas tij së bashku me aleatët dhe partnerët, "për paqen, sigurinë dhe një të ardhme më të mirë për njerëzit e rajonit".

Kujtojmë se disa javë më parë, ministri i Mbrojtjes i Shqipërisë, Ermal Nufi, deklarori se Shqipëria do të ketë një përfaqësi në Gaza duke filluar me katër oficerë shtabi, në kuadër të Forcës Ndërkombëtare Stabilizuese.