Presidenti i ShBA-së, Donald Trump, përjashtoi përdorimin e armëve bërthamore kundër Iranit, duke thënë se Uashingtoni nuk ka nevojë për të dhe duke theksuar se "nëna e të gjitha bombave" nuk është bërthamore.
Gjatë një interviste të enjten për Newsmax, kur u pyet për raportimet se administrata e tij po e shqyrtonte përdorimin e kësaj bombe kundër Iranit, ndoshta pas zgjedhjeve të ndërmjetme në SHBA, Trump theksoi se ajo është armë konvencionale.
"Nëna e të gjitha bombave nuk është bërthamore”, tha Trump, duke shtuar: "Kjo është thjesht një bombë jashtëzakonisht e madhe."
Ai përsëriti se arma nuk është bërthamore.
"Nëna e të gjitha bombave është një bombë e madhe, por nuk është bërthamore", tha ai.
Trump përjashtoi përdorimin e armëve bërthamore, duke thënë se ShBA-ja nuk ka nevojë t'i përdorë ato.
"Jo, nuk do të përdorja armë bërthamore. Nuk na duhet”, tha ai.
Trump ngriti gjithashtu mundësinë e goditjeve të mëtejshme ndaj objekteve bërthamore të Iranit, përfshirë një objekt të dyshuar nëntokësor të njohur si "Pickaxe Mountain" (Mali Kazma).
"Tani po e shqyrtojmë Pickaxe Mountain. Mund të na duhet të shkojmë atje," tha ai.
"Do të provojmë një goditje në atë objekt. Do ta shkatërrojmë shpejt."
Kur u pyet nëse një operacion i tillë do të përfshinte trupa tokësore amerikane, Trump u përgjigj: "Jo, nuk e shoh këtë. Nuk e shoh."
Ai tha se tërheqja përpara se të sigurohet që Irani nuk mund të përftojë armë bërthamore mund të kërkonte veprime të reja ushtarake amerikane brenda një viti.
"Duam ta bëjmë të tillë që ata të mos kenë kurrë armë bërthamore," tha ai.
Lufta me Iranin do të përfundojë shumë shpejt
Trump parashikoi gjithashtu se lufta do të mbarojë së shpejti, duke thënë se Teherani po negocion me Uashingtonin.
"Lufta me Iranin do të përfundojë shumë shpejt. Do të mbarojë shumë shpejt", tha ai.
"Në një mënyrë apo në një tjetër, do të mbarojë shumë shpejt. Dhe nafta do të bjerë si gur — edhe çmimet e gazit po ashtu”, tha ai.
Trump pretendoi se zyrtarët iranianë kishin kërkuar ndalimin e operacioneve ushtarake amerikane dhe izraelite.
"Na kanë kërkuar të ndalojmë. Dhe ne e bëjmë, sepse po negociojmë me ta", tha ai.
Kur u pyet nëse i besonte kryeministrit izraelit Benjamin Netanyahu, Trump u përgjigj: "Nuk i besoj askujt, sinqerisht."
"Nuk i besoj askujt", tha ai. "Në botën e politikës, nuk i besoj askujt".
