Gjermania lëshoi sot një paralajmërim udhëtimi për Francën, pas protestave të dhunshme në vendin fqinj, duke paralajmëruar udhëtarët për mundësinë e trazirave të tjera.

“Tregoni kujdes dhe nëse është e mundur, shmangni demonstratat”, thuhet në njoftimin e publikuar në faqen e internetit të Ministrisë së Jashtme gjermane.

Ministria paralajmëroi se nuk mund të përjashtohen protesta të tjera “dhe ndoshta trazira në ditët në vijim”. Ajo këshilloi udhëtarët të ndjekin udhëzimet e forcave franceze të sigurisë.

“Ju lutemi të keni parasysh se për shkak të ndryshimeve të fundit në ligj, mund të përballeni me gjoba dhe kërkesa për dëmshpërblim nëse nuk largoheni nga demonstratat e paautorizuara dhe të dhunshme kur ju kërkohet ta bëni këtë”, thuhet në njoftim.

Të dielën, policia franceze përdori gaz lotsjellës dhe topa uji kundër protestuesve në qendër të Parisit, një ditë pasi demonstratat mbarëkombëtare kundër rritjes së kostos së jetesës u shoqëruan me dhunë, që çoi në arrestimin e më shumë se 2.000 personave.