Guvernatori i Kalifornisë, Gavin Newsom, ka deklaruar se ndihma ushtarake amerikane për Izraelin “duhet të kushtëzohet”, duke theksuar se ky qëndrim po bëhet gjithnjë e më shumë konsensus brenda Partisë Demokratike, teksa po zhvillonte një fushatë në New Hampshire përpara një kandidimi të mundshëm në zgjedhjet presidenciale të vitit 2028.
“Ndihma duhet të kushtëzohet”, tha Newsom për Washington Examiner, duke iu referuar dhunës së kolonëve në Bregun Perëndimor të pushtuar dhe politikave të kryeministrit izraelit, Benjamin Netanyahu, të cilat, sipas tij, minojnë perspektivat për një zgjidhje me dy shtete.
“Bibi Netanyahu ka bërë një punë të jashtëzakonshme duke u izoluar nga pjesa tjetër e botës dhe gjithnjë e më shumë edhe nga populli amerikan”, tha Newsom, duke shtuar se “dëmi që ai ka shkaktuar është i pallogaritshëm”.
Newsom e cilësoi luftën e Izraelit në Gaza si një “katastrofë morale”, por nuk specifikoi se cilat forma të ndihmës ushtarake duhet t’u nënshtrohen kushteve, duke theksuar dallimet ndërmjet sistemeve mbrojtëse, si Iron Dome, si dhe të armëve sulmuese.
Ai tha se ndihma amerikane duhet t'i promovojë parimet e të drejtave të njeriut, përfshirë ato të përcaktuara në kornizat e Ligjit Leahy, një dispozitë federale e vitit 1997 që ndalon qeverinë amerikane të financojë njësi ushtarake të huaja për të cilat ekzistojnë “informacione të besueshme” mbi përfshirjen në shkelje të rënda të të drejtave të njeriut.
Demokratët kundërshtojnë
Deklaratat e tij vijnë në një kohë kur po rritet kundërshtimi brenda Partisë Demokratike ndaj transferimit të armëve drejt Izraelit.
Shumica e senatorëve demokratë votuan në pranverë për të bllokuar një shitje armësh, ndërsa më shumë se 100 demokratë të Dhomës së Përfaqësuesve kundërshtuan një masë tjetër në korrik.
Izraeli pritet të mbajë zgjedhjet më 27 tetor, të cilat, sipas Newsom, mund të ndikojnë në këtë debat.
Newsom e ka kritikuar më parë Netanyahun, ndërsa ka shprehur mbështetje për Izraelin, përfshirë vizitën e tij në këtë vend në vitin 2023, ku u takua me të mbijetuarit e sulmit të Hamasit.
Në muajin mars, ai e cilësoi si një “keqardhje” përshkrimin e Izraelit si një “shtet aparteidi”.
