Presidenti i ShBA-së, Donald Trump, deklaroi të mërkurën se ShBA-ja do t’i vazhdojë sulmet “e ashpra” ndaj Iranit, pasi ushtria amerikane kreu sulme ndaj objektivave iraniane gjatë natës në përgjigje të rrëzimit të një helikopteri sulmues mbi Ngushticën e Hormuzit.
Trumpi tha se forcat amerikane “i goditën fort dje dhe do t’i godasin përsëri fort sot”, duke lënë të kuptohet se nuk është i shqetësuar për ndikimin që sulmet e mëtejshme mund të kenë mbi negociatat për përfundimin zyrtar të luftës ShBA-Izrael kundër Iranit.
“Do t’i sulmojmë, do t’i sulmojmë shumë ashpër. Po, mendoj se kemi të drejtë ta bëjmë këtë për shkak të helikopterit. Ata rrëzuan një makinë vërtet të jashtëzakonshme”, u tha Trumpi gazetarëve në Zyrën Ovale, duke iu referuar rrëzimit të një helikopteri amerikan Apache të hënën.
“Do të shohim çfarë do të ndodhë me marrëveshjen. Ishim shumë pranë një marrëveshjeje, por ata vazhdojnë të na zvarrisin dhe të na marrin për budallenj”, shtoi ai.
Trumpi pretendoi gjithashtu se ShBA-ja ka “nxjerrë jashtë funksionit miliona fuçi naftë” përmes një sërë operacionesh të fshehta gjatë luftës, duke sugjeruar se një nga objektivat ka qenë stabilizimi i çmimeve në tregjet globale.
“Askush nuk e di këtë. E dini kush nuk e di? Irani, deri tani. Një natë më parë neutralizuam 22 anije që lëviznin natën pa drita, sepse nuk kanë radarë, pasi ua kemi shkatërruar”, tha ai.
Lufta ShBA-Izrael kundër Iranit, e cila nisi në shkurt, ka tronditur tregjet globale të energjisë, duke rritur çmimet e naftës, gazit natyror të lëngshëm dhe karburantit të avionëve. Rritja e kostove ka ndikuar në një gamë të gjerë sektorësh ekonomikë dhe te konsumatorët në mbarë botën.
Vendimi i Trumpit për të përshkallëzuar sulmet pas rrëzimit të helikopterit Apache vjen pas muajsh tensionesh rajonale që nisën më 28 shkurt, kur sulmet izraelite dhe amerikane ndaj Iranit shkaktuan një cikël përballjesh ushtarake, kundërsulmesh dhe mosmarrëveshjesh diplomatike.
Irani dhe Izraeli shkëmbyen gjithashtu sulme në ditët e fundit përpara se të tërhiqeshin, duke treguar brishtësinë e armëpushimit dhe përpjekjeve të ndërmjetësuesve rajonalë dhe ndërkombëtarë për të ringjallur diplomacinë dhe për të shmangur një konflikt më të gjerë.
