Shqipëria dhe Maqedonia e Veriut janë përfshirë në renditjen e 15 itinerareve më të bukura të çiklizmit në botë, përmes Liqenit të Ohrit, i cili kalon në Shqipëri dhe Maqedoninë e Veriut. Liqeni i Ohrit renditet në vendin e 14-të, me 76 pikë nga 100, sipas një studimi të platformës së udhëtimeve aventureske Explore.

Itinerari, rreth 90–96 kilometra i gjatë dhe për ta përshkuar gjithë qarkun, çiklistët duhet ta kalojnë kufirin mes dy vendeve.

Sipas të dhënave të cituara në studim, kërkimet në Google për termin “cycling holiday” janë rritur me 292 për qind, ndërsa një pjesë e konsiderueshme e itinerareve më të bukura në botë ndodhen në Evropë.

Për ta hartuar renditjen, Explore përdori teknologjinë e gjurmimit të syrit për ta matur reagimin e 200 pjesëmarrësve ndaj pamjeve nga 52 itinerare të njohura çiklizmi në vende të ndryshme të botës. Teknologjia mati sa shpejt secila pamje tërhiqte vëmendjen dhe për sa kohë e mbante atë. Rezultatet u kombinuan në një indeks “eye-catching”, me maksimum 100 pikë.

Në krye të renditjes është Bow Valley Parkway, mes Banff dhe Lake Louise në Kanada, me 97 pikë nga 100, e ndjekur nga Great Ocean Road në Australi me 94 pikë.

Evropa dominon megjithatë pjesën tjetër të klasifikimit. Tuscany Gravel Routes në Itali renditet e treta me 91 pikë, falë rrugëve mes vreshtave, kodrave, qiparisave dhe qyteteve historike të Toskanës.

Në vendin e 14-të vjen qarku i Liqenit të Ohrit, Shqipëri–Maqedoni e Veriut, me 76 pikë, duke e futur edhe Shqipërinë dhe Maqedoninë e Veriut në një renditje ku 8 nga 15 itineraret më të bukura ndodhen në Evropë.