Presidenti ukrainas, Volodymyr Zelenskyy, deklaroi se vendi i tij i ka paraqitur ShBA-së propozime për përfundimin e luftës me Rusinë.
“Propozimet tona ia kemi përcjellë palës amerikane”, tha ai gjatë një fjalimi të martën në mbrëmje.
“Amerika mund të ndihmojë në forcimin e mbrojtjes sonë, para së gjithash përmes mbrojtjes ajrore, dhe mund t’i bëjë presion Rusisë që të ndryshojë planet e saj: nga zgjatja e luftës te përgatitja për përfundimin e saj”, shtoi Zelenskyy.
Deklaratat e tij vijnë në një kohë kur përpjekjet për paqe të ndërmjetësuara nga ShBA-ja janë ndërprerë, ndërsa lufta Rusi-Ukrainë ka hyrë në vitin e pestë.
Me ndërmjetësimin e ShBA-së, Rusia dhe Ukraina zhvilluan tri raunde bisedimesh për paqe gjatë janarit dhe shkurtit, në përpjekje për të gjetur një zgjidhje për luftën.
Megjithatë, negociatat janë pezulluar që atëherë. Moska dhe Kievi ia kanë atribuuar ndërprerjen përqendrimit të ShBA-së tek Irani dhe konflikti i armatosur në Lindjen e Mesme, i cili filloi më 28 shkurt.
Duke iu referuar një raporti të inteligjencës ukrainase, presidenti ukrainas pretendoi gjithashtu se Rusia planifikon të mobilizojë më shumë trupa pas zgjedhjeve të shtatorit.
“Ai (presidenti rus Vladimir Putin) dëshiron të krijojë përshtypjen se rusët gjoja e mbështesin luftën...
“Dhe më pas, pas të ashtuquajturave zgjedhje, ai planifikon një mobilizim shtesë dhe të shpejtë të disa qindra mijëra rusëve deri në fund të vitit, si dhe po aq të tjerëve vitin e ardhshëm. Kjo do t’i shtohet rekrutimit që po përpiqen ta kryejnë përmes kontratave”, tha ai.
Putini miratoi një mobilizim të pjesshëm ushtarak në vitin 2022, përmes të cilit 300 mijë persona u rekrutuan në ushtri.
Që atëherë, Ukraina ka pretenduar vazhdimisht se Rusia do të ndërmarrë një valë të re mobilizimi. Zyrtarët rusë i kanë mohuar këto pretendime. Zëdhënësi i Kremlinit, Dmitry Peskov, deklaroi në mars se kjo çështje “nuk është në rendin e ditës”.
Ndërkohë, nënkryetari i Këshillit të Sigurisë së Rusisë, Dmitry Medvedev, tha muajin e kaluar se vendi “nuk ka nevojë për mobilizim”, ndërsa deklaratat mbi këtë çështje i cilësoi si “provokim të rremë” dhe “propagandë”.
