Turqit e Thrakës Perëndimore kanë reaguar ashpër ndaj vendimit të gjykatës, e cila dënoi me nga 17 muaj burg katër turq të Thrakës Perëndimore, lidhur me ngjarjet e ndodhura në Xhaminë "Çınar" të Ksantit (İskeçe).

Në deklaratën e bërë nga Federata Evropiane e Turqve të Thrakës Perëndimore (ABTTF), vendimi i gjykatës u cilësua si i padrejtë dhe u dha një mesazh mbështetjeje për personat e gjykuar.

Në deklaratë u theksua se kjo çështje gjyqësore është e lidhur drejtpërdrejt me liritë fetare të pakicës turke të Thrakës Perëndimore dhe me çështjen e Myftinisë, duke drejtuar kritika ndaj praktikës së Greqisë për emërimin e myftinjve nga ana e shtetit.

Gjithashtu u kujtua se personat e dënuar kishin shfaqur reagimin e tyre ndaj myftinjve të emëruar nga shteti grek dhe kishin mbështetur myftiun e zgjedhur nga vetë pakica. Në deklaratë u tërhoq vëmendja se vendimi i gjykatës synon autonominë fetare të pakicës turke të Thrakës Perëndimore.

Çfarë kishte ndodhur?

Më 11 tetor 2024, pas ceremonisë së hapjes së Medresesë së Ksantit, ku mori pjesë edhe Sekretari i Përgjithshëm i Ministrisë së Arsimit dhe Çështjeve Fetare të Greqisë, Jorgos Kalancis, myftinjtë e emëruar nga shteti grek kishin dashur të falnin ditën e xhuma në Xhaminë "Çınar". Megjithatë, ata u protestuan nga xhemati i xhamisë dhe u penguan të hynin brenda.

Në seancën gjyqësore të zhvilluar më 18 qershor lidhur me këtë ngjarje, Gjykata e Ksantit dënoi me nga 17 muaj burg shtetasit Hüseyin Baltacı, Ozan Ahmetoğlu, Bahri Belço dhe Murat Köse. Gjykata vendosi pezullimin e këtyre dënimeve me burg (shndërrimin e tyre me kusht) dhe kthimin e tyre në gjobë monetare.

Në Greqi, ndërsa myftinjtë dhe udhëheqësit e vakëfeve të pakicës turke të Thrakës Perëndimore emërohen nga shteti, pakica turke prej shumë vitesh kërkon me ngulm që liderët e saj fetarë të përcaktohen përmes zgjedhjeve.