Presidenti francez, Emmanuel Macron, tha të premten se rendi ndërkombëtar po bëhet gjithnjë e më i fragmentuar, mes rikthimit të politikës së forcës, sfidave ndaj rregullave të përbashkëta dhe rritjes së detyrimit ekonomik.
“Vërejmë se rendi ndërkombëtar është i fragmentuar, i shënuar nga rikthimi i politikës së forcës, nga sfidimi i rregullave të përbashkëta, nga detyrimi ekonomik, ndërhyrjet dhe lufta e informacionit”, tha Macron gjatë një konference të përbashkët për media në Paris me kryeministrin kanadez Mark Carney.
Macron tha se Franca dhe Kanadaja ndajnë angazhimin për sundimin e ligjit, rendin ndërkombëtar, politikat klimatike të bazuara në shkencë dhe vlerat demokratike.
“Dy vendet tona ndajnë të njëjtën bindje: demokracitë duhet të jenë të kthjellëta, të forta dhe të afta të veprojnë së bashku”, tha ai.
Ai theksoi nevojën për forcimin e kapaciteteve të pavarura vendimmarrëse, si dhe të qëndrueshmërisë ekonomike, industriale, energjetike dhe teknologjike.
“Të dy besojmë në tregtinë e lirë të bazuar në rregulla, në dobi të të gjithëve, dhe në refuzimin e logjikës së detyrimit ekonomik”, shtoi Macroni.
Presidenti francez rikonfirmoi gjithashtu angazhimin e Parisit dhe Otavës për zgjidhjen e konflikteve përmes diplomacisë, veçanërisht në Lindjen e Afërt dhe Lindjen e Mesme.
“Është kjo rrugë që, shpresoj, së shpejti do të çojë në një marrëveshje mes Shteteve të Bashkuara të Amerikës dhe Iranit”, tha ai.
Macroni përsëriti gatishmërinë e Francës për ta mbështetur zbatimin e çdo marrëveshjeje, përfshirë përpjekjet për rikthimin e qarkullimit në Ngushticën e Hormuzit dhe ofrimin e ekspertizës për një marrëveshje më të gjerë.
“Kjo marrëveshje duhet të jetë e fortë sa i përket çështjeve bërthamore dhe balistike, si dhe stabilitetit rajonal”, shtoi lideri francez.
Ai tha gjithashtu se Franca dhe Kanadaja mbështesin sovranitetin, sigurinë dhe integritetin territorial të Libanit, si dhe përpjekjet e autoriteteve libaneze për të përmbushur përgjegjësitë e tyre dhe për të luftuar terrorizmin.
Macroni argumentoi më tej se stabiliteti i qëndrueshëm rajonal do të ishte i pamundur pa stabilizimin e Gazës dhe avancimin e zgjidhjes me dy shtete.
“Kjo, të cilën e mbrojtëm së bashku një vit më parë përmes një nisme të përbashkët diplomatike me disa vende mike, në praktikë është më e kërcënuar se kurrë nga vendime të papërgjegjshme”, tha ai.
Nga ana e tij, Carney vlerësoi “udhëheqjen personale” të Macronit për njohjen e Palestinës.
“Ju keni bërë një ndryshim të rëndësishëm në ruajtjen e mundësisë për një zgjidhje me dy shtete në afat të mesëm, si dhe në adresimin e nevojave urgjente humanitare në afat të shkurtër”, u shpreh ai.
Carney theksoi se Kanadaja njoftoi në forumin për zgjidhjen me dy shtete në Paris një kontribut prej 100 milionë dollarësh ndihmë urgjente humanitare për palestinezët në Bregun Perëndimor dhe Gaza.
Ai njoftoi gjithashtu se Franca dhe Kanadaja do të krijojnë një marrëveshje të re për sigurinë e informacionit, me qëllim thellimin e bashkëpunimit industrial dhe të mbrojtjes.
“Kjo nënkupton mundësinë për shkëmbimin e informacionit të klasifikuar mes sektorëve tanë përkatës”, tha Carney.
Ai shtoi se marrëveshja do të krijojë mundësi të reja bashkëpunimi në sektorët e hapësirës, aeronautikës dhe inteligjencës artificiale, përmes kërkimit të përbashkët, zhvillimit dhe partneriteteve tregtare.
