Вршителот на должноста премиер на Косово и лидер на Движењето Самоопределување (ЛВВ) Албин Курти и лидерот на Демократската лига на Косово (ЛДК) Лумир Абдиџику објавија дека постигнале договор за кандидатурата на Беким Сејдиу како заеднички кандидат за претседател на Република Косово.
На прес-конференција по средбата, лидерот на ЛДК Лумир Абдиџику изјави дека од 9 јули започнале континуирани состаноци и дискусии за институционалната стабилност и дека се решени да најдат решение за да се продолжи понатаму.
Абдиџику рече дека преговорите не биле лесни.
„Двете страни беа посветени на избор на консензуален кандидат за претседател на Република Косово. За време на разговорите беа споменати бројни истакнати имиња кои имаат поддршка и од граѓаните и од многу делови на Косово, кои дале професионален и национален придонес во нашето општество и кои имаат демократски и државнички вредности. Од сите предложени и разгледани имиња, меѓу кои сите беа истакнати поединци, за време на заедничките разговори се согласивме за едно име, а тоа е професор д-р Беким Сејдиу. Кариерата на професор д-р Сејдиу е исклучителна и богата, со разновидни искуства и важни функции“, рече Абдиџику.
На конференцијата присуствуваше и Беким Сејдиу, кој рече дека е многу почестен што двете партии се согласиле за неговото име како кандидат за претседател на Косово.
Тој рече дека е свесен за товарот на одговорност што го носи функцијата претседател, но дека ќе им служи на граѓаните и на државата со посветеност.
Беким Сејдиу беше судија на Уставниот суд од 2015 до 2021 година. Пред неговото назначување за судија на Уставниот суд, тој беше амбасадор на Косово во Туркије од 2008 до 2012 година и генерален конзул во Њујорк од 2012 до 2014 година.
Сејдиу е и професор на Правниот факултет на Универзитетот во Приштина од 2002 година.
Што се однесува до изборот на нов претседател, пратениците имаат рок од 60 дена за негов избор, сметано од денот на конституирањето на Собранието на Косово.
За да започнат роковите за формирање на извршната власт, најнапред претседателот треба да му го врачи мандатот на кандидатот за премиер. Потоа тој или таа има рок од 15 дена да ја добие довербата на пратениците.
Извор: АА
