Туркије денес остро го осуди продолжувањето на активностите на Израел по должината на таканаречената „Линија Суфа 53“ во сириската покраина Кунејтра, наведувајќи дека овој потег има цел создавање „нов свршен чин“ во земјата.
„Остро го осудуваме поткопувањето на Договорот за неангажирање на силите од 1974 година од страна на Израел преку продолжување на неговите активности по должината на таканаречената 'Линија Суфа 53' во сириската покраина Кунејтра, како и неговите обиди за создавање нов свршен чин во Сирија“, се наведува во соопштението на турското Министерство за надворешни работи.
Министерството ја повика меѓународната заедница без одложување да преземе ефективни и одлучни чекори за да се стави крај на експанзионистичките политики на Израел, кои ги ескалираат тензиите во регионот и да се обезбеди негово повлекување од окупираната сириска територија.
Анкара нагласи дека одлучно ќе продолжи да ги поддржува суверенитетот, политичкото единство и територијалниот интегритет на Сирија и заедно со земјите од регионот ќе продолжи да ги презема неопходните чекори.
Израелската војска денес соопшти дека убила маж во јужна Сирија, кој наводно се обидел да влезе во една од нејзините воени позиции во рамките на безбедносната зона.
Сириската телевизија Ал-Ихбарија претходно објави дека израелските сили привеле млад човек пред неговиот дом во Ал-Хамидија, во северната провинција Кунејтра, за време на рации и претреси на неколку куќи во градот.
Медиумот исто така објави дека израелските сили влегле во селото Марија во провинцијата Дара со повеќе од 15 воени возила и извршиле претрес на неколку домови.
Израелските сили исто така испукале две артилериски гранати кон периферијата на браната Ал-Мантара во централниот дел на Кунејтра, наведе медиумот.
Израел продолжува со упади на сириската територија по падот на режимот на Башар ал-Асад кон крајот на 2024 година.
Сирискиот претседател Ахмад ал-Шара го истакна ова прашање минатиот месец во Њујорк, на 81-та сесија на Генералното собрание на ОН, наведувајќи дека од крајот на 2024 година, Израел извршил приближно 500 воздушни и артилериски напади, повеќе од 1.200 упади и околу 300 апсења и притворања.
