Централната изборна комисија на БиХ ги објави прелиминарните резултати од 80 отсто од избирачките места. За Претседателството на БиХ водат Денис Бечировиќ (164.369), Даријана Филиповиќ (92.854) и Жељка Цвијановиќ (213.812), додека во трката за претседател на ентитетот РС води Саво Миниќ (202.245).

За првпат во повоената историја на Босна и Херцеговина, првите прелиминарни резултати од гласањето беа објавени еден час по затворањето на избирачките места, а скенерите за гласачки ливчиња ја завршија работата без да има потреба од преминување на рачно броење, јавува Анадолу.

Претседателот на Централната изборна комисија на Босна и Херцеговина (ЦИК БиХ), Јован Калаба, на прес-конференција ги соопшти првите прелиминарни изборни резултати добиени преку електронска трансмисија од скенерите за гласачки ливчиња, врз основа на обработени околу 80 отсто од избирачките места.

Калаба нагласи дека гласањето со употреба на електронски скенери поминало успешно и дека на ниту едно избирачко место не било регистрирано преминување на рачно, традиционално броење на гласовите.

„Од сите општински и градски изборни комисии ни беше потврдено дека немало преминување на традиционално гласање. Тоа значи дека скенерите ја завршија својата работа за која и беа наменети“, изјави Калаба.

Поради утринското доцнење при отворањето или прекини во текот на денот, некои избирачки места го продолжија работното време најдоцна до 22 часот, со инструкција од ЦИК да им се овозможи гласање на сите избирачи кои во моментот на затворањето на избирачките места се затекнале во редовите.

Претседателство на БиХ: Водат Беќировиќ, Филиповиќ и Цвијановиќ

По обработени околу 80 отсто од избирачките места, за бошњачки член на Претседателството на БиХ води Денис Беќировиќ (Обединети за државата БиХ) со 164.369 гласови, пред кандидатот на СДА, Бакир Изетбеговиќ, кој има 148.036 гласови. Семир Ефендиќ (СБиХ) освои 110.530, додека Фахрудин Радончиќ (СББ) освои 9.320 гласови.

За член на Претседателството на БиХ од редовите на хрватскиот народ води Даријана Филиповиќ (ХДЗ БиХ) со 92.854 гласа, следуваат Славен Ковачевиќ (ДФ) со 55.475 и независниот кандидат Зденко Лучиќ со 44.345 гласови.

Во трката за член на Претседателството на БиХ од редовите на српскиот народ води Жељка Цвијановиќ (СНСД) со освоени 213.812 гласови. Маринко Божовиќ (СДС) освои 102.877, а Небојша Вукановиќ („За правда и ред“) 67.707 гласови.

Претседател на Република Српска

Во трката за претседател и потпретседатели на ентитетот Република Српска води кандидатот на СНСД, Саво Миниќ, со 202.245 гласови, пред Бранко Блануша (СДС), кој има 160.936 гласови. Рамиз Салкиќ (СДА) освои 6.740, а Ќамил Дураковиќ 4.413 гласови.

За Парламентарното собрание на БиХ од Федерацијата БиХ најмногу гласови освои СДА (186.675), а следуваат СДП БиХ (91.886) и коалицијата ХДЗ БиХ – ХС (83.834), Странката за Босна и Херцеговина (51.356), Народ и правда (39.535), Жељко Комшиќ – За граѓанска држава (36.976).

Од Република Српска за државниот парламент води СНСД (151.032), пред Движењето „Сигурна Српска“ на Драшко Станивуковиќ (53.448) и СДС (50.328).

Во Парламентот на Федерацијата БиХ води СДА со 180.970 гласови, втор е СДП БиХ со 90.327, додека коалицијата предводена од ХДЗ БиХ има 86.922 гласа, а Странката за Босна и Херцеговина освои 52.671 глас.

Од ЦИК наведоа дека ажурираните резултати континуирано ќе се објавуваат на официјалната интернет-страница „izbori.ba“.