Индија денес ги отфрли тврдењата на Илон Маск дека „одредени олигарси“ ги блокираат сателитските комуникациски услуги на Старлинк (Starlink) во земјата со цел да го задржат својот монопол, оценувајќи ги таквите наводи како неосновани.

Без директно да го спомене Маск, Министерството за комуникации на Индија во соопштение наведе дека владата воспоставила „праведна и недискриминаторска рамка за издавање дозволи за сите телекомуникациски услуги, вклучително и сателитските комуникациски услуги“.

Оттаму соопштија дека лиценци за телекомуникации им биле доделени на три глобални оператори за мобилни лични сателитски комуникации, кои користат „сателитски комуникации преку сателити во негеосинхрона орбита“.

Во соопштението се наведува дека „како дел од овој процес, во тек е безбедносна проценка за сите три субјекти кои добиле лиценца“ и дека „сите три субјекти се наоѓаат во приближно иста регулаторна фаза“.

„Според тоа, сугестијата дека рамката или нејзината примена се неправедни или дискриминаторски е неоснована и погрешна“, изјавија од министерството.

Старлинк, оддел на компанијата СпејсИкс (SpaceX) на Маск, брзо го прошири своето глобално присуство и работи во повеќе од 150 земји и територии. Компанијата обезбедува интернет-поврзување за оддалечени или недоволно покриени области користејќи соѕвездие од сателити во ниска орбита околу Земјата.

Две индиски телекомуникациски компании, Бхати Ертел (Bharti Airtel) и Рилајанс Џио (Reliance Jio), минатата година потпишаа договори со SpaceX за воведување на интернет-услугите на Старлинк во земјата.

Маск на својата платформа X напиша: „За жал, блокирани сме од одредени олигарси кои сакаат да ја задржат својата монополска контрола врз индискиот народ“.

„Можете да претпоставите кои се тие... Ова е злосторство против народот на Индија!“, изјави тој, одговарајќи на објава поврзана со работењето на Старлинк во најнаселената земја во светот.

Индија има 958 милиони корисници на интернет, со стапка на пенетрација на интернетот од над 70%.

Минатата година, премиерот Нарендра Моди се сретна со Маск во Вашингтон за да разговараат за вселената, мобилноста, технологијата и управувањето.