Владејачката партија во Русија, „Единствена Русија“, освои 349 од вкупно 450 места во Државната дума – долниот дом на парламентот – на парламентарните избори одржани минатиот викенд, изјави денеска шефицата на руското изборно тело.
На прес-конференција во Москва посветена на резултатите од изборите одржани од 18 до 20 септември, Ела Памфилова соопшти дека „Единствена Русија“ освоила 50,79 отсто од гласовите. Следи Комунистичката партија со 37 освоени места, додека Либерално-демократската партија, „Нови луѓе“ и „Праведна Русија“ обезбедија по 23, 19, односно 17 пратенички места.
Партијата „Родина“, како и четворица независни кандидати, освоија по едно место во Државната дума, додаде таа.
Излезноста на гласачите изнесуваше 59,8 отсто, при што гласаа околу 67,4 милиони луѓе, рече таа, додавајќи дека повеќе од 7 милиони луѓе во Русија гласале на далечина, преку електронско гласање.
Памфилова наведе дека над 280.000 луѓе гласале од странство, а биле отворени 333 избирачки места во 152 земји.
Процентот на неважечки гласачки ливчиња изнесувал 1,36 отсто, а резултатите од регионалните избори во еден округ во Кировската област биле прогласени за неважечки, изјави таа.
Изборите, одржани од 18 до 20 септември, беа први парламентарни избори во Русија по 2022 година и се одржаа во услови на тековната војна во Украина. Гласање се спроведе и во областите на Украина под руска контрола – потег што беше осуден од Киев и од некои западни влади.
