Претседателот на САД, Доналд Трамп, ги повика земјите веднаш да го напуштат Меѓународниот кривичен суд (МКС), нарекувајќи го „зла“ и „нечесна институција“. Антонио Кошта, претседателот на Европскиот совет, брзо одговори.
Кошта рече дека ваквите напади се неприфатливи и дека Обединетите нации мора да останат во центарот на мултилатералниот систем.
„Обединетите нации се под притисок од геополитичка поларизација, финансиски ограничувања и институционални недостатоци. Неприфатливо е да се заканува или напаѓа Меѓународниот кривичен суд. Одговорноста не може да зависи од политичката погодност“, рече Коста.
Во вторник, Трамп ја повтори својата критика кон судот со седиште во Хаг, тврдејќи дека тој ги пречекорува своите овластувања кога ја применува својата надлежност врз граѓани на земји кои не го ратификувале Римскиот статут, вклучувајќи ги САД и Израел.
САД воведоа финансиски санкции и забрана за виза за службеници на МКС, а според извори запознаени со ситуацијата, се подготвуваат дополнителни мерки што би можеле да ја отежнат работата на судот.
Американскиот државен секретар, Марко Рубио уште во јули почна дипломатска кампања за негово укинување, тврдејќи дека судот ги загрозува американските војници и другите луѓе поврзани со политиката на Трамп за депортирање мигранти и напаѓање бродови осомничени за шверц со дрога.
По почетокот на американската кампања, Венецуела и Чад го објавија своето повлекување од МКС, додека Буркина Фасо, Мали и Нигер го сторија тоа минатата година. Науру ја објави одлуката за повлекување оваа недела, наведувајќи го намаленото значење на судот.
Европската унија зазеде спротивен став и сака да спречи американските мерки да ја загрозат работата на Меѓународниот кривичен суд.
Високата претставничка на ЕУ за надворешна политика, Каја Калас, изјави дека ЕУ разгледува начини да му помогне на судот да продолжи да работи и дека ќе се обиде да обезбеди поширока меѓународна поддршка за неговата работа.
Критичарите на американската политика кон МКС предупредуваат дека притисокот од Вашингтон може да ги ослабне меѓународните напори за утврдување одговорност за воени злосторства.
