Американскиот претседател Доналд Трамп денеска изјави дека очекува да постигне договор со Иран по американските избори на средината на мандатот, предупредувајќи дека е пред „голема одлука“ – дали да се стреми кон договор или да ја уништи таа земја.

„Треба да донесам голема одлука: Дали ќе се склучи договор со Иран што ќе им овозможи да се обноват и да создадат многу поголема земја отколку што некогаш била – можеби една од најголемите на Блискиот Исток, па и во светот – или да ја уништам Исламската Република и тоа да го направам брзо, без никогаш повеќе да им дадам шанса да убиваат и уништуваат луѓе и земји?“, рече Трамп во своето обраќање пред Генералното собрание на ОН во Њујорк.

Трамп изјави дека верува оти „ќе постигнеме договор веднаш по изборите“, тврдејќи дека Техеран чека да види како ќе поминат републиканците на изборите на средината на мандатот во ноември.

„Она што не го сфаќаат е дека јас не се кандидирам. Тоа веќе го направив и победив убедливо“, рече тој, додавајќи дека ќе остане на функцијата уште две и пол години и ѝ помага на Републиканската партија на изборите.

„Воопшто не им придавам значење на изборите кога станува збор за Иран, ниту пак ќе им придадам. Тоа воопшто не ми е на ум. Единственото што ми е важно е дека Иран никогаш нема да поседува нуклеарно оружје“, рече тој.

Трамп изјави дека започнал преговори со Иран откако ја презел функцијата и понудил „целосна економска соработка“ во замена за прекин на нуклеарната програма на Техеран и на поддршката за тероризмот. Тој тврдеше дека Техеран го одбил предлогот.

Тој повторно тврдеше дека САД ја „збришале“ нуклеарната програма на Иран „под купишта урнатини“.

„Откако му дадов на Иран секаква можност за договор, презедов мерки за да осигурам дека ниту САД, ниту која било друга земја, некогаш ќе мора да се соочат со таква ноќна мора“, рече тој.

Трамп тврдеше дека сите 159 ирански поморски пловни објекти се уништени, заедно со воздухопловните сили, радарите и системите за противвоздушна одбрана на Техеран. Капацитетите за производство на ракети и беспилотни летала се „речиси целосно уништени“, рече тој.

Тој исто така тврдеше дека економијата на Иран е уништена и дека инфлацијата е „далеку над 300%“.

Трамп понатаму го обвини Иран за кршење на примирјето договорено за нуклеарните преговори, преку изведување напади врз цивилни бродови од други земји кои минуваат низ Ормускиот Теснец. Тој исто така ги отфрли тврдењата дека САД остануваат без муниција, наведувајќи дека Вашингтон поседува повеќе муниција отколку што „воопшто би можел да помисли да употреби“ и дека ги зголемува своите залихи до нивоа без преседан.

САД и Израел започнаа војна против Иран на 28 февруари, во која, според Техеран, загинаа илјадници луѓе. Техеран возврати со ракетни напади и напади со беспилотни летала низ регионот и практично го затвори Ормускиот теснец, стратешка рута за снабдување со енергенси.

Оттогаш, војната се прошири низ регионот, додека дипломатските напори за прекин на непријателствата продолжуваат.