Хакери украле повеќе од 6 милијарди долари криптовалути во четврток, со што го соборија претходниот рекорд за најголемата кражба од ваков вид во историјата. Неколку компании специјализирани за следење на крипто трансакции се сомневаат дека Северна Кореја стои зад нападот, објави Си-Ен-Ен.
До четврток вечерта по американско време, група компании за криптовалути успеале да замрзнат приближно 3 милијарди долари украдени средства. Во исто време, продолжи интензивната трка со хакерите за да се пронајде и обезбеди остатокот од дигиталната валута.
Нападот бил насочен кон дигитални паричници на платформата Бинанс (Binance), најголемата светска берза за криптовалути.
Од компанијата изјавија доцна во четврток дека прелиминарните резултати од истрагата покажуваат дека напаѓачите го користеле лаптопот на еден од инженерите на компанијата.
Според Бинанс, напаѓачот така добил пристап до сервисниот склад и започнал неовластени трансакции за повлекување средства.
Компанијата соопшти дека ќе ги покрие сите загуби со свои средства и пари од посебен фонд за итни случаи, нагласувајќи дека средствата на корисниците се безбедни.
Бинанс привремено ги суспендираше депозитите и исплатите додека не се завршат безбедносните проверки, ги поништи компромитираните овластувања и ги повика полицијата и експертите за анализа на блокчејн за да ги пронајдат и да се обидат да ги вратат украдените средства.
Обемот на нападот ги запрепасти и експертите за криптовалути.
„Ова е најголемиот хакерски напад во историјата“, изјави за Ројтерс Аравинд Сринивасан, раководител на систематско тргување преку шалтер во големата фирма за криптовалути ГСР.
Нападот врз Бинанс повторно го отвори прашањето за безбедноста на платформите за криптовалути, кои се соочуваат со значително построги регулаторни барања во Европската Унија од крајот на 2024 година.
Тогаш стапи во сила европската регулаторна рамка МиЦА(MiCA), воведувајќи унифицирани правила за давателите на услуги поврзани со криптовалути. Компаниите кои сакаат да обезбедат такви услуги во Европската Унија мора да имаат соодветна лиценца, а преодниот период за нејзино добивање заврши на 1 јули оваа година.
Меѓу компаниите кои имаа тешкотии со добивањето лиценца беше Бинанс.
Во јуни, најголемата крипто берза во светот ја повлече својата апликација за лиценца во Грција откако локалниот регулатор не успеа да донесе одлука во очекуваниот рок. Компанијата во тоа време објави дека ќе се обиде да добие одобрение во друга земја-членка на Европската Унија.
Новите европски правила се фокусираат на заштита на корисниците, транспарентност на бизнисот и управување со ризици. Сепак, регулаторниот надзор не значи дека платформите се целосно заштитени од хакерски напади, како што покажува најновиот инцидент во Бинанс.
Компанијата ТРМ Лабс (TRM Labs), која е специјализирана за следење на трансакциите со криптовалути, ја припиша кражбата на елитна севернокорејска хакерска единица, наведувајќи го она што го нарекува солидна разузнавачка информација собрана преку анализа на блокчејн и други извори.
Сингапурската компанија Панголин Интелиџенс (Pangolin Intelligence) дојде до сличен заклучок.
Од таму велат дека Северна Кореја веројатно ќе се обиде да користи мрежа од организации за перење пари за да ги претвори украдените криптовалути во средства со кои може да располага.
Си-Ен-Ен контактираше со мисијата на Северна Кореја во Обединетите нации за коментар. Пјонгјанг претходно ги негираше обвинувањата за хакирање.
Извештаите од Обединетите нации и приватните безбедносни фирми покажуваат дека хакерите поврзани со Пјонгјанг украле милијарди долари од банки и компании за криптовалути во последните години.
