Кинескиот претседател Кси Џинпинг денес ги поддржа земјите од Блискиот Исток во изградбата на нова безбедносна архитектура и истакна дека палестинското прашање не треба да биде маргинализирано.
Кси го изјави ова за време на разговорите на највисоко ниво со египетскиот претседател Абдел Фатах ал-Сиси во Каиро, објави кинеската државна новинска агенција Синхуа.
„Кина ги поддржува земјите од регионот во изградбата на нова безбедносна архитектура за Блискиот Исток“, рече Кси, спротивставувајќи се на надворешното мешање во регионот.
„Народите од Блискиот Исток треба да останат господари на своите работи и треба да се отфрли надворешното мешање“, рече тој, повикувајќи ги Кина и Египет „заеднички да се спротивстават на унилатерализмот и актите на малтретирање“.
Си повика на „сеопфатно решение за заедничката безбедност“ во регионот и рече дека палестинското прашање „останува суштина на прашањето за Блискиот Исток и никогаш не треба да биде занемарено или маргинализирано“.
Исто така, тој повика на поддршка за „ефикасната улога“ на ОН во регионот и упати повик надворешните сили да се откажат од „двојните стандарди“ на Блискиот Исток.
Во услови на тензии во Ормускиот Теснец поради војната меѓу САД и Иран, Кси рече дека Кина е „подготвена да работи“ со земјите од Блискиот Исток за „заштита на безбедноста на меѓународните поморски патишта“.
Кси пристигна во Каиро вчера на дводневна државна посета, прва негова посета на Египет во последните 10 години.
Кинескиот претседател и Сиси зборуваа за зајакнување на билатералната соработка и регионалните случувања за време на разговорите во палатата Ал-Итихадија во Каиро.
Кси ги повика Кина и Египет да „создадат нови можности за соработка во областа на зелената енергија, електричните возила, воздухопловството и вселенската индустрија, дигиталната економија и современата земјоделска технологија“.
Во 1956 година Египет стана прва арапска и африканска земја што воспостави дипломатски односи со Народна Република Кина.
Двете земји воспоставија стратегиско партнерство во 1999 година, а односите ги подигнаа на ниво на сеопфатно стратегиско партнерство во декември 2014 година.
