Помладите генерации стареат биолошки побрзо од нивните претходници, што би можело да го зголеми ризикот од развој на тумори на порана возраст, покажува студијата на научници од Медицинскиот факултет на Универзитетот Вашингтон во Сент Луис.

Истражувањето е спроведено на повеќе од 160.000 луѓе од три генерации, а резултатите се објавени во списанието Природна медицина (Nature Medicine).

Студијата, предводена од епидемиологот Џин Цао, вклучувала податоци од повеќе од 154.000 млади возрасни лица од британската база на податоци УК Биобанк, како и повеќе од 10.000 учесници од Соединетите Американски Држави вклучени во истражувачката програма „Сите ние“ на Националните институти за здравство (НИХ).

Анализата на специфични биомаркери во крвта покажала дека луѓето родени во Обединетото Кралство помеѓу 1965 и 1974 година покажуваат поизразено системско стареење во споредба со оние родени помеѓу 1950 и 1954 година.

Сличен модел е забележан и во Соединетите Американски Држави, каде што луѓето родени помеѓу 1990 и 1999 година имаат повисоко ниво на системско стареење во споредба со генерацијата родена помеѓу 1965 и 1969 година.

Според резултатите од студијата, забрзаното стареење кај помладите испитаници е поврзано со осум проценти поголем ризик од развој на тумори во раниот живот, особено рак на белите дробови, гастроинтестиналниот тракт и матката.

Кога учесниците беа поделени во три групи според степенот на системско стареење, беше откриено дека луѓето со најизразено стареење имале 15 проценти поголем ризик од развој на рани тумори во споредба со оние со најмалку изразени знаци на стареење.

Научниците исто така откриле дека забрзаното стареење на имунолошкиот систем е поврзано со поголем ризик од ран развој на рак на белите дробови, додека забрзаното стареење на масното ткиво е поврзано со зголемен ризик од ран развој на колоректален рак.