Американскиот државен секретар Марко Рубио во вторникот им изјави на министрите за надворешни работи на Г7 дека САД ќе продолжат да му наметнуваат „разорни“ економски трошоци на Иран, истакнувајќи дека постојат и други опции, освен војна или прифаќање на неприфатливите ирански барања, изјавија четворица дипломати од Г7.

Коментарите на Рубио беа изнесени за време на состанокот во Париз на министрите за надворешни работи на Групата седум (Г7)- која ја сочинуваат Велика Британија, Канада, Франција, Германија, Италија, Јапонија и САД, како и Европската унија.

Дипломатите наведоа дека Рубио употребил остар јазик за да ги опише иранските власти. Двајца од нив изјавија дека тој ги нарекол „лудаци“.

Според дипломатите, Рубио рекол дека, наместо повторно да се започне војна или да се прифатат барањата на Иран, моменталната политика на Вашингтон, која се состои од строги економски санкции, дава резултати и ја ограничува способноста на Техеран да ги финансира своите регионални активности и своите застапнички групи.

„Рубио рече дека ќе продолжат со... (наметнување) разорни економски трошоци за Иран“, изјави еден од дипломатите, кои зборуваа под услов да останат анонимни.

Коментарите на Рубио дојдоа еден ден откако американскиот претседател Доналд Трамп изјави дека планира засега да се воздржи од нови воени напади врз Иран, по апелите од земјите во регионот, вклучително и од катарскиот премиер за време на разговорите во Белата куќа.

Трамп исто така изјави дека засега планира да ја задржи поморската блокада кон Иран во Ормускиот Теснец.

Катарскиот премиер во Париз

Катарскиот премиер шеик Мохамед бин Абдулрахман Ал Тани, пак, кој е клучен посредник во односите со Иран, по разговорите со Трамп направи ненајавена посета на состанокот на министрите за надворешни работи на Г7 во Париз. Таму тој се сретна со министрите од европските земји и од Саудиска Арабија.

Според двајца европски дипломати, по разговорите во Вашингтон, шеик Мохамед изразил умерен оптимизам дека сè уште е можно дипломатско решение за кризата, наместо понатамошна ескалација на конфликтот.

Според еден од дипломатите, некои од главните советници на Трамп, меѓу кои Рубио, новоименуваниот шеф на кабинетот во Белата куќа, Стивен Милер, и секретарот за финансии, Скот Бесент, ја поддржуваат политиката на одржување силен економски притисок врз Иран.

Потпретседателот Џеј Ди Венс, кој за поразите на републиканците на минатонеделните избори во средината на мандатот ја обвини војната со Иран, се залага за договор со Иран; сепак, според истиот извор, Трамп засега смета дека постигнување одржлив договор не е можно.

Од Белата куќа не одговорија веднаш на барањето за коментар.