Обвинителството на Сараевскиот кантон ја заврши истрагата за трамвајската несреќа што се случи во февруари во главниот град на Босна и Херцеговина во која загина студент, а една девојка беше тешко повредена.

Обвинетиот возачна трамвајот Аднан Касаповиќ се товари за сериозно кривично дело против безбедноста на јавниот превоз и загрозување на јавниот превоз.

Обвинението е доставено до Кантоналниот суд во Сараево, соопшти Обвинителството на Сараевскиот кантон.

Обвинителството изјави дека истрагата е спроведена по обемни истражни дејствија, тимски експертски проценки и собирање на голем број докази. Јавноста ќе биде подетално информирана за релевантните информации откако Обвинителството ќе ја добие одлуката на судот.

Во исто време, Обвинителството на Сараевскиот кантон издаде наредба да не се спроведува истрага за наводите од анонимната пријава и медиумските написи што се однесуваа на сервисирањето на магнетните сопирачки, системот за видео надзор и маркетиншките договори за закуп на рекламен простор во трамваите.

По проверка и анализа на собраните докази, Обвинителството заклучи дека пријавените дела не се кривични дела.

Трамвајска несреќа се случи на 12 февруари во близина на Националниот музеј во Сараево, кога трамвај излета од шините и удри во патниците што чекаа на станицата.

Во несреќата загина 23-годишниот Ердоан Моранкиќ, студент на Академијата за ликовни уметности во Сараево, а четири лица беа повредени.

Меѓу повредените беше и 17-годишно девојче кое претрпе сериозни повреди, вклучително и ампутација на ногата.

По трагедијата на 12 февруари, градската транспортна компанија ГРАС ги повлече од употреба сите трамваи од чешкиот производител ЧКД, чие возило ја предизвика несреќата.

Некои од овие трамваи се стари повеќе од 40 години и биле во употреба сè додека возниот парк не бил обновен со нови трамваи купени од швајцарскиот производител Стадлер.