Поранешниот светски шампион во снукер Греам Дот денес беше осуден на седум години затвор откако беше прогласен за виновен за сексуална злоупотреба на две деца.

Четириесет и деветгодишниот Шкотланѓанец, кој во 2006 година го освои Светското првенство во снукер, доживотно ќе остане и во регистарот на сексуални престапници, објави Би-Би-Си.

Дот ги негираше двете обвиненија за непристојно и развратно однесување кон девојче и момче во периодот од 1993 до 2010 година.

При изрекувањето на пресудата пред Високиот суд во Единбург, судијата лорд Хароуер рече дека Дот им „одзел значаен дел од нивното детство“ и дека неговото однесување ги имало карактеристиките на процес на придобивање на довербата на жртвите, со цел сексуална злоупотреба.

На судењето било кажано дека Дот ги наградувал децата со чоколада и други подароци, ја претставувал злоупотребата како игра и ги предупредувал дека никој нема да им поверува доколку кажат што се случило.

Злоупотребата на девојчето започнала кога имало околу девет години, а Дот 16 или 17, а втората жртва на сексуална злоупотреба, момче на околу осум години, била злоупотребувана по околу една деценија, објави Би-Би-Си.

Судијата рече дека делата претставувале „грубо нарушување на довербата“ и дека кај жртвите оставиле трајни чувства на страв, срам и гнев, кои влијаеле врз нивното ментално здравје и во зрелоста.

Казната е пресметана од 24 август, кога Дот бил притворен.

Дот го победи Питер Ебдон и ја освои својата единствена светска титула во театарот „Крусибл“ во Шефилд во 2006 година.

Тој уште двапати играше во финалето- во 2004 година изгуби од Рони О’Саливен, а во 2010 година беше поразен од Нил Робертсон.