Во текот на првите девет месеци од 2026 година на македонската територија регистрирани се 165 пожари кои зафатиле околу десеттина илјади хектари разновидна шума. Штетите од пожарите изнесуваат околу 10 милиони евра и тоа е петпати помалку во споредба со 2025 година, проценуваат од „Национални шуми“. Иако бројот е сличен како лани, штетите се значително помали.

Според достапните податоци од „Национални шуми“, во 2025 година штетите од пожарите изнесувале околу 50 милиони евра, а 2024 штетите изнесувале околу 83 милиони евра.

Заменик генералниот директор на претпријатието „Национални шуми“, Кире Михаилов, во изјава за телевизија „Сител“ појаснува дека овие суми не се однесуваат само на вредноста на изгорената дрвна маса, туку во пресметката влегуваат и трошоците за гасење, санација и пошумување, како и загубените функции на шумата.

Побрзата реакција и подобрата организација годинава овозможиле пожарите да бидат навреме откриени и локализирани со што се намалиле и зафатените површини. Од „Национални шуми“ како фактор го посочуваат и поголемиот ангажман на надлежните институции.

„Доброволните противпожарни друштва ни дадоа огромен инпут оваа година , значи помогнаа во огромна мерка. Трите авиони на ДЗС и полицискиот и армискиот хеликоптер во текот на целата сезона беа постојано активни“, вели Михаилов во изјавата.

Човечкиот фактор во речиси 90% од случаите е главната причина

Во делот на причините поради кои настануваат шумските пожари, и понатаму нема значителни промени. Човечкиот фактор во речиси 90 проценти од случаите е главната причина, без разлика дали станува збор за невнимание или намерно подметнување.