Унгарскиот премиер Петер Маѓар денеска повикувајќи се на медиумски извештаи, изјави дека Арон Орбан, помладиот брат на поранешниот премиер Виктор Орбан, е приведен под сомнение за шверц со луѓе.

„Според медиумските извештаи, Арон Орбан, братот на Виктор Орбан, е приведен под сомнение за шверц со луѓе. Националната канцеларија за враќање и заштита на средства и Националното биро за истраги ја продолжуваат својата истрага“, напиша Маѓар на американската социјална мрежа X.

Унгарските власти потврдија дека денеска е спроведена голема полициска операција во Будимпешта и на неколку места во округот Пешта, за време на која се приведени неколку лица и се претресени неколку локации.

Сепак, властите сè уште официјално не потврдија дека Арон Орбан е меѓу приведените.

Според унгарскиот портал Телекс, членови на Центарот за борба против тероризмот (TEK) се појавија во понеделник наутро на имот во Фотлигет, поврзан со компанијата на Арон Орбан.

Шефицата на Националната канцеларија за враќање и заштита на средства, Ана Унгер, не сакаше ниту да ја потврди ниту да ја негира оваа информација, но изјави дека истражителите презеле нови мерки во случајот што го засега и Орбан.

Истрагата е поврзана со претходни обвинувања за можни неправилности при добивање унгарски визи и дозволи за престој за странски државјани.

Поранешниот премиер Виктор Орбан реагираше на веста, обвинувајќи ја владата за политичка пресметка, тврдејќи дека тој бил вистинската цел на истрагата.

„Целта на оваа валкана политичка игра е да се елиминираат политичките противници и да се воспостави еднопартиски систем. Јас сум вистинската цел, а мојот помлад брат е само средство“, објави Орбан на социјалните мрежи.

Поранешниот премиер оцени дека властите се обидуваат да го одвлечат вниманието од прашањата поврзани со архивите на поранешната комунистичка тајна полиција, за кои владата, според него, требало да биде одговорна пред парламентарниот Комитет за национална безбедност.

„Она што се случува во Унгарија не е утврдување одговорност, туку политичка пресметка“, рече Орбан.

Националната канцеларија за враќање и заштита на средства и Националната канцеларија за истраги спроведуваат истражни дејствија во рамките на две кривични постапки.