Американскиот претседател Доналд Трамп во понеделник изјави дека прекинот на огнот со Иран е на ниски гранки, откако го отфрли одговорот на Техеран на мировниот предлог на САД и повторно ги разгоре стравувањата од војна.

Денови откако Вашингтон предложи враќање на преговарачката маса, Иран го испрати својот одговор во неделата, барајќи крај на непријателствата на сите фронтови, вклучително и во Либан каде што сојузникот на САД Израел се бори против милитантите на Хезболах.

Трамп брзо го отфрли тој предлог. Запрашан за статусот на прекинот на огнот, Трамп рече дека во моментов е на најниски гранки, откако го прочитал „ѓубрето што ни ги испратија“.

„Дури и не го прочитав до крај“, додаде тој.

Трамп, исто така, истакна дека Вашингтон ќе продолжи да бара дипломатско решение со сегашните ирански власти, инсистирајќи дека Техеран не смее да поседува нуклеарно оружје.

„Мојата стратегија е едноставна, Иран не смее да има нуклеарно оружје“, нагласи Трамп.

Тој наведе дека Техеран се согласува со одредени услови за време на преговорите, а потоа ги напушта.

„Тие се согласуваат со нас за одредени работи, а потоа го повлекуваат она што го кажале“, рече Трамп.

Според него, во Иран има „умерени“ и „лудаци“, оценувајќи дека умерените сакаат договор со САД, но се плашат од тврдокорните.

„Умерените очајно бараат договор. Лудите сакаат да се борат до крај“, рече Трамп.

Тој, исто така, оцени дека едномесечното примирје меѓу САД и Иран е „на апарат за одржување во живот“.

„Би рекол дека прекинот на огнот е на интензивна нега“, рече Трамп.

Трамп повтори дека не чувствува „никаков притисок или замор“ во врска со Иран и оцени дека САД веќе постигнале „голема воена победа“, со порака дека ќе „постигнат уште повеќе“.

Американскиот претседател, исто така, рече дека е „многу разочаран од Курдите“, тврдејќи дека не доставиле оружје наменето за противниците на иранскиот режим.

„Испративме оружје и муниција, требаше да бидат доставени, но тие ги задржаа“, рече Трамп.

Техеран го брани својот став

Техеран, исто така, побарал компензација за воено уништување, го нагласил својот суверенитет над Ормускиот теснец и ги повика САД да ја прекинат поморската блокада, да гарантираат прекин на понатамошните напади, да ги укинат санкциите и да ја укинат забраната за продажба на иранска нафта.

САД претходно предложија прекин на огнот пред да можат да започнат разговорите за потешки прашања, вклучително и нуклеарната програма на Иран.

„Нашето барање е легитимно: бараме крај на војната, крај на блокадата и пиратеријата и ослободување на иранските средства неправедно замрзнати во банките поради притисокот од САД“, изјави портпаролот на Министерството за надворешни работи, Есмаил Багеи.

Безбеден премин низ Ормускиот теснец и безбедноста во регионот и Либан се останатите ирански барања, кои ги смета за дарежлива и одговорна понуда, додаде тој.

Спорадичните судири околу клучниот морски премин го ставија на тест прекинот на огнот договорен на почетокот на април, кој во последните денови спречи тотална војна.

Анкетите во САД покажуваат дека конфликтот со Иран е непопуларен кај гласачите, соочени со нагло зголемување на цените на горивата помалку од шест месеци пред среднорочните избори кои ќе одредат дали републиканците на Трамп ќе ја задржат контролата врз Конгресот.

Трамп, во меѓувреме, патува во Пекинг во среда, каде што една од темите на неговите разговори со Кси Џинпинг сигурно ќе биде Иран. Американскиот претседател врши притисок врз Кина да го искористи своето влијание за да го охрабри Техеран да постигне договор со Вашингтон.

Багеи сугерираше дека Кина наместо тоа би можела да ја искористи посетата за да се спротивстави на американските цели во Заливот.

„Нашите кинески пријатели многу добро знаат како да ги искористат овие можности за да предупредат за последиците од нелегалните и насилни дејствија на Америка врз регионалниот мир и безбедност“, рече тој.