Косовскиот премиер, кој го предводи и Движењето Самоопределување (ЛВВ), вечерва на нова прес-конференција предложи претседателката на Академијата на науките и уметностите во Приштина, Јустина Широка Пуља, да биде кандидат за претседател на привремените институции и ја повика Демократската партија на Косово (ПДК) да гласа за неа.

Тој повтори дека Самоопределување е подготвено прво да гласа за измените на Законот за Специјалниот суд во Хаг ако ПДК се обврзе да учествува на седницата за избор на претседател.

„Нека претседателот на ДПК веднаш по мене излезе јавно и нека се обврзе дека 22 пратеници на ДПК ќе учествуваат заедно во гласањето за избор на претседател, а ние прво ќе гласаме за законот за специјализирани совети“, рече Курти.

Тој претходно на прес-конференција помалку од четири часа пред истекот на уставниот рок на полноќ во кој земјата мора или да избере нов претседател или да оди на нови парламентарни избори, ги предложи Глаук Коњуфца и Фериде Рушити за кандадати за претседател, изразувајќи подготвеност прво да гласа - во второ читање - за Предлог-законот за измени на Законот за Специјалниот суд.

„Најновиот предлог е овој: бидејќи лидерот на ПДК, Бедри Хамза, не може да се сретне со нас, нека излезе јавно вечерва и нека вети дека целата парламентарна група на ПДК ќе учествува во гласањето за претседател - или со гласање „за“, воздржано или гласање „против“. По таквото ветување, ќе гласаме за второто читање на предлог-законот, под услов да немаат проблем со непочитувањето на рокот од 72 часа помеѓу двете читања. Ќе гласаме за предлог-законот, а веднаш потоа ќе преминеме на гласање за претседател“, рече претходно Курти.

Тој изјави дека ПДК ја отфрлила неговата понуда да го поддржи професорот Беким Сејдиу како кандидат за нов претседател; по тоа, самиот Сејдиу објави преку социјалните мрежи дека не е вклучен во процесот на избор на нов претседател на земјата.

Сејдиу беше заеднички кандидат на ЛВВ и Демократската лига на Косово (ЛДК) за претседател, по договор меѓу двете партии. Сепак, договорот беше доведен во прашање кога шест пратеници на ЛДК се спротивставија на кандидатурата на Сејдиу. Следствено, Сејдиу се повлече од трката.

ЛВВ, заедно со партиите на несрпското малцинство, има вкупно 62 места во овој парламент; ПДК има 22 места, додека ЛДК има 18.

За избор на нов претседател се потребни 80 гласа во првите два круга гласање; потоа, претседателот може да биде избран со 61 глас „за“, под услов да бидат присутни 80 пратеници во салата.