Русија и Украина разменија обвинувања во врска со воздушните напади во текот на ноќта, во кои загинаа најмалку две лица во регионот околу Москва, соопштија локалните власти.

Андреј Воробјов, гувернер на Московскиот регион, соопшти дека 185 дронови биле соборени во 16 општини во регионот додека бил подложен на напад со беспилотни летала.

„Првичните извештаи укажуваат на двајца загинати, и девет повредени. Во нападот се оштетени и 47 приватни куќи во седум општини“, соопшти Воробјов

Одделно, градоначалникот на Москва, Сергеј Собјанин, тврдеше дека 650 дронови летале кон московскиот регион, при што 105 од нив биле уништени додека се приближувале кон главниот град.

Подоцна тој извести дека уште 29 дронови биле соборени додека се движеле кон Москва.

Локалните власти, исто така, објавија дека едно лице е повредено во Смоленскиот регион, додека две други се повредени во рускиот пограничен регион Брјанск поради ноќните удари.

Во Украина, Михајло Семикин, вршител на должноста шеф на Воената администрација на Запорожје, изјави дека најмалку пет лица се повредени поради удар врз станбена зграда во регионалниот главен град.

Украинската служба за вонредни состојби соопшти дека уште 11 лица се спасени од станбената зграда во Запорожје, истакнувајќи дека операциите за пребарување и спасување се завршени.

Службата соопшти дека персоналот за пребарување и спасување изгаснал пожар што избувнал на покривот на образовна институција во областа Оболонски во главниот град на Украина, Киев, по утринскиот руски напад, но дека никој не е повреден.

Одделно, гувернерот на Одеса, Олех Кипер, изјави дека зграда во сопственост на приватно претпријатие била оштетена во регионалниот главен град за време на рускиот напад во текот на ноќта, и дека избувнал пожар, но дека бил брзо изгаснат од страна на службите за итни случаи.

„Немаше жртви. Моментално се во тек операции за расчистување на местото“, додаде Кипер.

Ниту Москва ниту Киев сè уште не ги коментираа меѓусебните тврдења, а независната верификација на тврдењата е тешка поради тековната војна.

Москва и Киев ги засилија нападите во последните месеци, насочени кон логистичките центри, пристаништата и енергетската инфраструктура на другата страна.

Тие негираат дека намерно гаѓале цивилна инфраструктура, тврдејќи дека нападите се насочени кон воени цели или објекти поврзани со воени активности.