Северна Кореја го отстрани секое споменување на обединувањето со Јужна Кореја од својот ревидиран устав, според документ презентиран на прес-конференција на јужмокорејското Министерство за обединување во Сеул во среда, објави новинската агенција Јонхап.

Од основањето на земјата во 1948 година, севернокорејската влада тврди дека има за цел политичко обединување со јужниот дел од Корејскиот полуостров.

Севернокорејскиот лидер Ким Џонг Ун првпат се дистанцираше од таа цел во 2023 година кога ја прогласи Јужна Кореја за свој „главен непријател“.

Исто така, во јануари 2024 година, владата сруши споменик висок 30 метри што го симболизираше обединувањето во главниот град Пјонгјанг.

Потегот, кој беше толкуван различно, сега е вклучен во уставот.

Според документот презентиран на конференција во Министерството за обединување во Сеул, Северна Кореја сега ја дефинира својата територија како област што граничи со Кина и Русија на север и Јужна Кореја на југ, вклучувајќи ги придружните територијални води и воздушен простор.

Уставот не ја специфицира спорната поморска граница во Жолтото Море, особено околу таканаречената северна гранична линија, која претставува де факто демаркација меѓу двете држави.

Ревизијата ги отстрани сите формулации поврзани со обединувањето, вклучувајќи термини како „мирно обединување“ и „големо национално единство“, што ја одразува политиката на „две држави“ што ја заговара севернокорејскиот лидер Ким Џонг Ун.

Уставот не ја означува Јужна Кореја како „главен непријател“.

За прв пат, претседателот на Комисијата за државни работи беше уставно дефиниран како „шеф на државата“, што го постави над Врховното национално собрание во хиерархијата на институциите.

Новите одредби, исто така, му даваат на лидерот директна контрола врз нуклеарните сили, вклучително и правото да ги делегира тие овластувања, додека парламентот е лишен од можноста за импичмент, што дополнително ја ослабува неговата надзорна улога.

Ревидираниот устав е најновата во низата промени откако беше првпат усвоен во 1948 година и доаѓа во време на зголемени политички и безбедносни тензии на Корејскиот Полуостров.

Политикологот Ли Јунг Чул од Националниот универзитет во Сеул рече дека новата политика може да биде основа за „мирна коегзистенција“ меѓу двете корејски држави, објави Јонхап.

Други експерти гледаат зголемен ризик од потенцијален воен конфликт меѓу двете земји.

Од Корејската војна 1950-53 година, Корејскиот полуостров е поделен на комунистички северен и демократски југ.

Војната заврши со примирје, но двете земји никогаш не потпишаа мировен договор.