Веб-страници на повеќе влади во Европа и во светот вчера беа исклучени, откако биле откриени критични ранливости во еден широко користен програмски јазик што ги принуди операторите на веб-страници ширум светот забрзано да работат на заштита на своите системи.
Развивачите на програмскиот јазик ПХП во средата објавија итни поправки за ранливости кои со години се криеле во нивниот софтвер, сè додека не биле откриени со помош на вештачка интелигенција (ВИ).
Тие ги повикаа сите корисници веднаш да направат ажурирање.
Бидејќи технолошките компании предупредија дека некои хакери веќе ги искористуваат овие пропусти, владините агенции низ Европа беа меѓу оние што превентивно ги исклучија своите веб-страници.
Со оглед на тоа што поправката е сега јавно достапна, а алатките за вештачка интелигенција овозможуваат со мал напор да се изврши обратен инженеринг на пропустот, експертите велат дека се подготвуваат за бран упади, додека хакерите се обидуваат да дејствуваат побрзо од спроведувањето на ажурирањата.
ПХП, јазик што датира од раните 1990. години, се наоѓа во позадината на популарните платформи за веб-развој, па затоа неговите ранливости можат да влијаат на широк спектар на веб-страници, од онлајн продавници и новински портали до владини услуги.
ПХП е вграден во платформи како Ворд Прес, Друпал, Џумла и Магенто. Тоа значи дека секоја критична ранливост може да има огромни последици.
Пропустот во ПХП е откриен со помош на вештачка интелигенција, се наведува во независните извештаи на две компании за сајбер-безбедност.
Компанијата за сајбер-безбедност Виз, во сопственост на Алфабет, проценува дека ПХП напојува околу 70 проценти од светските веб-страници. Фирмата изјави дека „пропустите се меѓу најсериозните безбедносни ранливости откриени во ПХП, а веројатно и во историјата на софтверот“.
Виз објави дека независно открила повеќе пропусти користејќи модели на вештачка интелигенција, вклучувајќи ги Џемини4 Aргон на Гугл и ГПТ-5.6 Сол на ОпенАИ.
Во објава на блог, компанијата Калиф соопшти дека на 1 август ги открила пропустите во август користејќи го моделот ГПТ-5.6 Сол на ОпенAИ, како дел од преглед на ПХП кодот финансиран од ОпенАИ.
