Кремљ денес соопшти дека руската делегација на најновата рунда мировни преговори за Украина, со посредство на САД, во Абу Даби не остварила контакти со европските претставници што, исто така, допатувале во Обединетите Арапски Емирати во текот на преговорите.
„Не, такви контакти не беа планирани, не беа предвидени и такви контакти не се одржаа“, изјави портпаролот на Кремљ, Дмитриј Песков, одговарајќи на новинарско прашање дали руската делегација се сретнала со европските претставници на првиот ден од обновените разговори.
Русија и Украина вчера започнаа нова рунда мировни преговори со посредство на САД во главниот град на Обединетите Арапски Емирати, а разговорите продолжија и денес.
Најновите средби се први трилатерални преговори по преговорите во Женева, Швајцарија, во февруари, на кои им претходеа две рунди преговори во Абу Даби во јануари и февруари.
Пред почетокот на преговорите, украинските делегати и американските претставници одделно се сретнаа во Абу Даби со претставници на Велика Британија, Франција, Германија, Италија, НАТО и Европската комисија.
Песков рече дека руската делегација го информира претседателот Владимир Путин за случувањата во преговорите.
Тој додаде дека за преговорите во Абу Даби било дискутирано „на еден или друг начин“ за време на средбата на Путин со белорускиот претседател Александар Лукашенко во Москва вчера, оценувајќи дека преговорите биле сеопфатни.
Песков, исто така, рече дека Москва не добила барање од Осло за уште еден телефонски разговор меѓу Путин и норвешкиот премиер Јонас Гар Стере.
Стере и финскиот претседател Александер Стуб иницираа телефонски разговор со Путин кон крајот на минатиот месец.
Коментирајќи го поморскиот договор што вчера го потпишаа Велика Британија и другите членки на Заедничките експедициски сили (ЈЕФ), Песков рече дека Москва прво ќе ги процени неговите можни последици, а потоа ќе го утврди својот став.
„Ова партнерство сè уште треба да се анализира за да се утврди како овие планови би можеле да влијаат врз интересите на нашата земја. Откако ќе заврши таа анализа, ќе може да формулираме став.“
Британското Министерство за одбрана вчера соопшти дека членките на ЈЕФ потпишале договор за иницијативата „Северна поморска иницијатива“, чија цел е зајакнување на поморската соработка.
Министерството наведе дека иницијативата ќе ја „зголеми безбедноста во Северна Европа, Северен Атлантик и Балтичкото Море“.
ЈЕФ е мултинационално воено партнерство во кое членуваат Данска, Естонија, Финска, Исланд, Латвија, Литванија, Холандија, Норвешка, Шведска и Велика Британија.
