Американскиот претседател Доналд Трамп денеска изјави дека верува оти договорот меѓу Украина и Русија е близу. Ова е впечатокот на Трамп по средбата со украинскиот претседател Володимир Зеленски на маргините на Генералното собрание на ОН во Њујорк.

„Имаме многу добар однос, двајцата. Претседателот (Зеленски) и јас се обидуваме да најдеме решение и мислам дека тоа ќе се случи. Навистина мислам така“, рече Трамп. „Но, односот е многу цврст, а таков е и односот со Европа. А видовте што се случи неодамна со Гренланд, што беше нешто навистина посебно.“

На прашањето дали сè уште верува дека Украина може да ја врати целата своја територија, Трамп рече: „Па, мислам дека тие ќе постигнат договор, а не сакам да кажам каков ќе биде тој договор. Многу разговараме за тоа, вклучително и со претседателот (Владимир) Путин, и мислам дека нешто ќе се случи.“

„Но, секако, тие се многу добри борци. Навистина, можат да бидат горди на себе“, рече тој, опишувајќи го раководството на Украина како „многу способно“.

Осврнувајќи се на украинските напади врз руските капацитети за преработка на нафта, Трамп рече: „Нападите во внатрешноста на Русија врз капацитетите за преработка и врз дизелот – се чини дека тоа претставува сериозен удар за Русите. Тоа е исто така сериозен удар и за цената на дизелот.“

„Мислам дека и двајцата (Путин и Зеленски) сакаат да видат крај на војната. Да бидам искрен со вас, време е. Многу луѓе ги губат животите, а тие не го сакаат тоа“, рече Трамп.

Во врска со можното производство на ракети „Патриот“ во Украина, Трамп изјави: „Разговараме за тоа. Сега ќе разговараме за тоа“, рече тој. „Многу способно производство. Мислам, постојано зборуваме за тоа. Многу способни луѓе. Навистина неверојатно способни луѓе.“