На денешниот состанок на Извршниот комитет на УЕФА во Солун беа објавени градовите домаќини на финалињата во европските купови во наредните години.

На состанокот е одлучено финалето на Лигата на шампионите во 2028 година да се игра во Минхен, а во 2029 во Барселона на реновираниот Камп ноу.

Минхен беше единствен кандидат за организација на финалето во 2028 година.

Алијанц Арена релативно неодамна беше домаќин на финалето, во 2025 година. Тогаш Пари Сен Жермен го декласира Интер со убедливи 5-0 и за првпат во својата историја ја освои европската титула.

На истиот стадион се играше и незаборавното финале во 2012 година, кога Баерн Минхен на домашен терен го пречека Челси. Германскиот тим поведе со голот на Томас Милер, но Дидие Дрогба во финишот донесе израмнување. По продолженијата, англискиот клуб беше поуспешен на пенали и стигна до својот прв трофеј во Лигата на шампионите.

За домаќинството во 2029 година, пак, Барселона водеше битка со Лондон и стадионот Вембли.

На крајот, УЕФА му ја довери организацијата на Камп Ноу, со што финалето во Лигата на шампионите ќе се врати во Барселона по три децении.

Последен пат Камп Ноу беше домаќин на завршниот натпревар во 1999 година, кога Манчестер Јунајтед приреди едно од најголемите финални пресврти во историјата на натпреварувањето.

Баерн тогаш имаше предност речиси до самиот крај, но „црвените ѓаволи“ во судиското продолжение со головите на Теди Шерингам и Оле Гунар Солскјер направија целосен пресврт и славеа со 2-1, освојувајќи ја титулата европски шампион.

Што се однесува до Лига Европа, довербата ја доби Балканот: финалето во 2028 ќе биде во Букурешт, а во 2029 во Белград на новиот национален стадион кој се гради во Сурчин.

Националниот стадион во Белград треба да биде завршен следната година, додека според последните информации, завршувањето на работите се очекува на почетокот на 2028 година.

Во Лигата на конференции, финалето во 2028 ќе биде на стадионот на Јувентус во Торино, а една година подоцна во Будимпешта.

Суперкупот на УЕФА во 2027 ќе се игра во Амстердам, во 2028 во Астана, Казахстан.