Претседателот на Украина, Володимир Зеленски,денеска изјави дека поради војната, Русија има сериозни проблеми и на фронтот и во економијата, велејќи дека рускиот претседател Владимир Путин ја губи војната.

Како што објавија украинските медиуми, Зеленски разговараше со новинарите пред зграда во населбата Дарницки во Киев, која беше уништена во руски напад.

Украинскиот претседател нагласи дека на земјата ѝ се потребни повеќе ракети за воздушна одбрана и најави дека Киев ќе одговори на синоќешниот интензивен руски воздушен напад врз украинската престолнина.

Тој изјави дека е очигледно дека Русија дополнително ќе ги зголеми нападите врз Украина, особено со балистички ракети, додека во исто време истакна дека во последните недели украинските сили извршуваат успешни напади врз нафтени и воени објекти во Крим, кој Русија нелегално го анектираше, што, рече тој, го вознемирува руското раководство.

Државната служба за вонредни ситуации на Украина објави дека операциите за пребарување и спасување продолжуваат по рускиот воздушен напад врз Киев.

Според најновите податоци, бројот на жртви се искачи на 21, додека 85 лица се повредени, меѓу кои и две деца.

Градоначалникот на Киев, Виталиј Кличко, претходно објави дека 3 јули ќе биде прогласен за ден на жалост во главниот град на Украина во спомен на жртвите од нападот.

Украинските воздухопловни сили објавија дека во нападот врз Киев и други делови од земјата, Русија испалила вкупно 74 ракети од различни видови, вклучувајќи крстосувачки, балистички и хиперсонични, и лансирала 496 беспилотни летала (дронови), додека украинската одбрана изјави дека се соборени 48 ракети и 476 дронови.