Претседателот на Туркије, Реџеп Таип Ердоган, во неделата повторно ја потврди поддршката на Туркије за напорите на Азербејџан за воспоставување траен мир на Јужен Кавказ, истакнувајќи дека ослободувањето на Карабах ги отвори вратите за нова ера во регионот.
„Како што ја поддржувавме праведната борба на Азербејџан, така ги поддржуваме и неговите искрени напори за воспоставување траен мир во нашиот регион“, рече Ердоган на заедничката прес-конференција со претседателот на Азербејџан, Илхам Алиев, во Шуша, по повод одбележувањето на шестгодишнината од ослободувањето на Карабах.
Говорејќи по билатералната средба со Алиев во канцеларијата на гувернерот на Шуша, Ердоган рече дека му е драго што престојува во Азербејџан по повод шестгодишнината од победата во Карабах.
Тој, исто така, рецитираше стихови во чест на Шуша, опишувајќи ја како град што го грее срцето како драга изрека и вжарен жар, украсен со миризливи рози.
Ердоган изрази почит и благодарност кон оние што ги загубиле животите во борбата за ослободување на Карабах, а на ветераните им се заблагодари за нивната жртва, посакувајќи им здравје и долг живот.
Тој рече дека азербејџанскиот народ, обединет под водство на Алиев, со големо херојство ја вратил слободата на Карабах, опишувајќи ја победата како одраз на праведната кауза на Азербејџан и извор на гордост за целиот туркиски свет.
Ердоган рече дека ослободувањето на азербејџанските територии од окупацијата за време на Втората војна во Карабах, која траеше 44 дена во 2020 година, го означило почетокот на нова ера на Јужен Кавказ.
„Нашата задача денес е победата извојувана на бојното поле да ја крунисаме со траен мир и стабилност“, рече тој.
– Туркије ги цени напорите на Азербејџан
Тој ги пофали и континуираните напори на Азербејџан за обновување на ослободените територии.
„Исклучително ги цениме напорите на Азербејџан за обновување на Карабах и враќање на некогашната живост на овој регион“, рече тој.
„Секој дом во кој повторно оживеало огништето, секоја градба што се издигнува и секој дел од историското наследство што се обновува во Карабах ја покажуваат довербата на азербејџанскиот народ во иднината“, рече Ердоган, додавајќи дека Туркије ќе продолжи да ги споделува своите искуства и да придонесува во напорите за обнова и развој.
Како примери за билатералната соработка, тој посочи неколку заеднички проекти, меѓу кои и Меѓународниот центар за шумарска обука на Туркије и Азербејџан, како и расадничките капацитети воспоставени во Џебрајил со придонес на Министерството за земјоделство и шумарство на Туркије.
Ердоган рече дека во Агдам започнала и изградбата на училиште со 40 училници, на површина од 14.500 квадратни метри, додавајќи дека се надева оти заедно со Алиев ќе го отвори објектот следната година.
Говорејќи за развојот на инфраструктурата за време на патувањето од Меѓународниот аеродром Физули до Шуша, Ердоган наведе дека делегацијата поминала низ седум тунели.
„Овие седум тунели покажуваат колку е успешна изградбата на инфраструктурата во регионот“, рече тој, изразувајќи уверување дека Шуша и Физули ќе изгледаат значително поинаку при неговата следна посета. Напредокот тој им го припиша на решителноста и посветеноста на азербејџанското раководство и неговиот тим.
– Односите меѓу Туркије и Азербејџан
Истакнувајќи ги длабоките врски меѓу двете земји, Ердоган рече дека односите меѓу Туркије и Азербејџан го достигнале сегашното високо ниво откако поминале низ различни историски искушенија.
„Односите меѓу Туркије и Азербејџан го достигнаа сегашното високо ниво откако поминаа низ различни историски искушенија. Ова единство на срцата, кое го опишуваме со слоганот ‘Една нација, две држави’, е вечен факел што црпи сила од нашето заедничко минато и ја осветлува нашата иднина“, рече тој.
Тој нагласи дека врската меѓу двата народа далеку ги надминува заедничкиот јазик, историјата и културата.
„Затоа радоста на Баку ја доживуваме како радост на Анкара, а гордоста на Шуша како гордост на целиот наш народ“, рече Ердоган.
Тој, исто така, ја истакна важноста на Декларацијата од Шуша, потпишана на 15 јуни 2021 година, со која билатералните односи беа подигнати на ниво на сојузништво.
„Оние што се обидуваат да го ослабат нашето братство, зацврстено со сојузот воспоставен со декларацијата потпишана во Шуша на 15 јуни 2021 година, никогаш нема да ги остварат своите цели, ниту сега ниту во иднина, исто како што не успеаја во тоа ниту претходно“, рече тој.
„Со Божја помош, нашето единство ќе трае вечно“, додаде тој.
Ердоган рече дека Туркије и Азербејџан работат и на ширење на оваа визија низ целиот туркиски свет, опишувајќи го напредокот на Организацијата на туркиските држави како најконкретен резултат на нивната заедничка решителност и напори.
Тој му се заблагодари на Азербејџан за напорите за зајакнување на единството и солидарноста во туркискиот свет за време на неговото претседавање со организацијата, порачувајќи дека Туркије за време на своето претседавање ќе работи на тоа организацијата да стане поефикасна и институционално посилна.
– Единството на Азербејџан и Туркије е вечно и непоколебливо
Алиев изрази благодарност за поддршката на Туркије за време на 44-дневната Втора војна во Карабах, нагласувајќи дека Азербејџан никогаш нема да ја заборави солидарноста што ја покажале Ердоган и турскиот народ.
„Во текот на сите 44 дена од Втората војна во Карабах, вие, претседателе Ердоган, и братскиот турски народ бевте со нас. Тоа никогаш нема да го заборавиме“, рече Алиев.
Тој го опиша единството на Азербејџан и Туркије како вечно и непоколебливо, истакнувајќи дека ќе пропаднат обидите за нарушување на нивните блиски односи.
„Нашето единство и братство со Туркије се непоколебливи. Оние што се обидуваат да вметнат клин меѓу нас никогаш нема да успеат“, рече тој.
Алиев истакна дека Втората војна во Карабах уште еднаш го покажала единството на Туркије и Азербејџан, потсетувајќи дека со Декларацијата од Шуша на билатералните односи официјално им бил доделен статус на сојузништво.
Сепак, тој нагласи дека двете земји отсекогаш биле сојузници, дури и пред потпишувањето на декларацијата.
„Народите на Туркије и Азербејџан се братски народи. Во светот не постојат други народи и држави што се толку блиску поврзани како нас. Тоа е нашето големо богатство“, рече тој.
„Декларацијата од Шуша само ги стави овие историски и културни односи во официјална рамка. Она што нè поврзува се заедничката историја, етничките корени, јазикот, книжевноста и духовните вредности. Тоа е големо богатство. Денес и меѓудржавните односи се развиваат врз основа на тоа богатство и цврстите темели“, додаде тој.
Алиев: Никому нема да му дозволиме да застане меѓу нас
Алиев повтори дека двете земји нема да им дозволат на надворешни фактори да ја нарушат нивната солидарност.
„Ние, како два народа и, пред сè, како двајца лидери, го чуваме ова богатство. Никому нема да му дозволиме да застане меѓу нас или да фрли сенка врз нашето единство, братство и солидарност заради сопствените интереси“, рече тој.
Алиев го пофали и растечкото меѓународно влијание на Туркије под водство на Ердоган, наведувајќи дека таа земја станала голема сила што има свој глас во глобалните прашања.
„Силната економија на Туркије, големиот индустриски потенцијал и политичката тежина денес се реалност. Тоа многу нè радува, а истовремено нè прави посилни“, рече тој.
Тој истакна дека и Азербејџан во последните години остварил значителен развој и дека продолжува стабилно да напредува.
„Заедно сме многу посилни. Единството на Туркије и Азербејџан е важен фактор во регионот што опфаќа голема географска област. Тоа е фактор на стабилност, соработка и безбедност“, рече Алиев.
На крајот од обраќањето, Алиев рече дека присуството на Ердоган во Карабах на Денот на победата, и покрај неговиот густ распоред, уште еднаш му ја покажало на светот силата на билатералните врски.
„Уверен сум дека ова единство ќе биде вечно. Никој во Туркије или Азербејџан нема никакво сомневање во тоа“, рече тој.
„Бевме заедно во минатото, бевме заедно за време на војната, заедно сме и денес и ќе бидеме заедно и во иднина“, додаде тој.
– Знамињата се веат едно покрај друго
На крајот од обраќањето, Ердоган рецитираше стихови од азербејџанскиот поет Бахтијар Вахабзаде, посветени на заедничкиот идентитет и солидарноста на двете земји.
„Нека даде Бог нашето црвено знаме со полумесечина и ѕвезда и славното знаме на Азербејџан засекогаш да се веат едно покрај друго на небото“, рече тој.
Ердоган, исто така, на азербејџанскиот народ му го честиташе Денот на државното знаме, 9 ноември, упатувајќи поздрави и изрази на наклонетост и заблагодарувајќи му се на Алиев за срдечното гостопримство.
