Најмалку 14 лица загинаа, а десетици други се хоспитализирани откако голем пожар зафати висока зграда во северната кинеска провинција Шанси, објавија државните медиуми денес.

Инцидентот се случил во неделата вечерта во Таијуан, главен град на провинцијата Шанси, јави новинската агенција „Синхуа“ со седиште во Пекинг, повикувајќи се на локалните власти.

Во неделата, околу 38 лица биле пренесени во болница, меѓу кои и петмина кои веќе биле починати. До понеделникот наутро, бројот на жртвите се зголеми на 14.

Зградата се наоѓа во центарот на Таијуан, во близина на болници, училишта, трговски центри и туристички локалитети.

Причината за пожарот сè уште е предмет на истрага.

Во Кина често се случуваат смртоносни пожари поради недоволно строгите градежни прописи.

Во ноември минатата година, голем пожар зафати неколку високи згради во Хонгконг, при што загинаа 168 лица.

Еден месец подоцна, во пожар во станбена зграда во јужната кинеска провинција Гуангдунг загинаа 12 лица.