Седмиот смртен случај како последица на западнонилската треска е регистриран во државата, потврди на денешната прес-конференција министерот за здравство Сашо Клековски.

Починатиот пациент бил на возраст од 69 години, жител на скопската Општина Гази Баба, кој повеќе од 38 дена бил хоспитализиран и се борел со болеста.

„Во врска со состојбата со западнонилска треска, од моето последно известување, имаме еден починат. Тоа е пациент кој најдолго беше хоспитализиран- преку 38 дена во болницата“, рече Клековски.

Според него, сите најнови регистрирани случаи од викендот наваму се лоцирани во Скопје Север и додаде дека веќе е побарано од градоначалниците да посветат внимание на активностите во овој дел од градот.

Клековски рече дека има и нов сомнителен случај кој е од населбата Радишани.

Во однос на хоспитализираните пациенти, рече дека вкупниот број во моментот изнесува 19 лица.

Прашан зошто сите смртни случаи од западнонилска треска се мажи, Клековски појасни дека ова е демографска карактеристика забележана и во големи светски студии, каде што стапката на заболување со невроинвазивна форма и смртноста е значително поголема кај машкиот пол.

„Најголемата студија е во Америка на над 3 000 случаи. Во таа студија е јасно дека и морбидитетот, односно стапката на заболување со невроинвазивната форма, и смртноста е поголема кај мажите“, одговори тој.

Во Македонија додаде дека морбидитетот е 3,7 : 1 однос мажи – жени.

Тој вели дека други две состојби се поврзани со заболувањето и смртноста, а тоа се хроничната бубрежна болест и претходните мозочни удари (цереброваскуларни инциденти), кои статистички почесто ги погодуваат мажите.

„Можно е, хипотетички, кај мажите да се почести цереброваскуларните инциденти, бидејќи знаеме дека статистички жените, посебно во добар дел од животот, се заштитени од кардиоваскуларни инциденти“, додаде Клековски.

На прес-конференцијата на 1 септември, министерот Клековски рече дека од почетокот на епидемијата во земјава до тој ден се регистрирани 55 случаи на заболени од западнонислка треска, од кои 53 лица се лабораториски потврдени.

Тој информира дека е регистрирана уште една, трета угината птица, кај која е потврден вирусот западен нил.

Станува збор за гавран кој е лоциран на територијата на Општина Карпош, поточно кај Драмскиот театар.

Клековски апелира до граѓаните да не пријавуваат одамна угинати, изедени и распаднати птици бидејќи на нив не можат да се извршат тестирања.

Посочи фокусот на пријавување да бидат гаврани, а напомена дека тој од Скопје сега ќе биде пренасочен кон внатрешноста, бидејќи состојбата во главниот град отприлика е позната.

Според министерот, наодите од внатрешноста на државата ќе бидат епидемиолошки поважни отколку наодите во Скопје.