Türkiye dënoi të premten lirimin nga një burg grek të Alexandros Giotopoulos, i dënuar si drejtues i organizatës terroriste “17 Nëntori”, duke e cilësuar vendimin e autoriteteve greke si mungesë respekti ndaj diplomatëve turq të vrarë dhe familjeve të tyre.
“Në termat më të fortë dënojmë lirimin më 21 maj 2026 të drejtuesit të organizatës terroriste ‘17 Nëntori’, Alexandros Giotopoulos”, thuhet në deklaratën e Ministrisë së Jashtme të Türkiyes, e cila e përshkroi atë si organizatorin e sulmeve kundër diplomatëve turq në Athinë.
Sipas deklaratës, Giotopoulos u lirua pavarësisht se ishte dënuar me 17 burgime të përjetshme dhe 25 vite shtesë burg për organizimin e sulmeve kundër diplomatëve turq në Greqi.
Ministria theksoi se ai qëndronte pas vrasjes në vitin 1991 të Çetin Görgü, atasheut për shtyp në Ambasadën turke në Athinë, tentativës për vrasjen po atë vit të këshilltarit të ambasadës Deniz Bölükbaşı, si dhe vrasjes në vitin 1994 të këshilltarit Haluk Sipahioğlu.
Sipas Ankarasë, ky veprim përbën “një shfaqje të papranueshme tolerance” ndaj “këtij terroristi të neveritshëm” dhe është “një mungesë e rëndë respekti ndaj kujtimit të diplomatëve tanë dëshmorë dhe familjeve të tyre”.
Türkiye u bëri thirrje gjithashtu autoriteteve greke të shmangin veprime që mund të dobësojnë përpjekjet kundër terrorizmit dhe të përmbushin përgjegjësitë e tyre në lidhje me ndëshkimin e terroristëve të dënuar.
Giotopoulos, 82 vjeç, u lirua të enjten nga një burg në Athinë pasi një panel gjyqësor miratoi lirimin e tij me kusht, duke argumentuar se ai është në moshë të thyer.
