Më shumë se 40 departamente franceze u vunë sot nën alarm portokalli për nxehtësi ndërsa vendi përgatitet për valën e pestë të nxehtësisë që nga qershori.

Shërbimi kombëtar i motit "Meteo-France" vendosi 43 departamente nën alarm portokalli për nxehtësi, me temperatura maksimale që pritet të arrijnë 35 gradë Celsius deri në 37 gradë Celsius.

Vapa pritet të intensifikohet më tej të mërkurën, me temperatura maksimale që parashikohet të arrijnë 36 gradë Celsius deri në 39 gradë Celsius ndërsa 67 departamente do të vendosen nën alarm portokalli.

Temperaturat parashikohet të mbeten të larta të enjten dhe të premten, duke arritur 35 gradë Celsius deri në 39 gradë Celsius në shumicën e rajoneve dhe duke u ngjitur në nivel lokal në 40 gradë Celsius.

Ndërsa Franca përjeton valën e pestë të nxehtësisë që nga qershori, nivelet e ujit po vazhdojnë të bien për shkak të kushteve të vazhdueshme të thatësirës.

Drejtori i kërkimit të ekologjisë ujore në institutin e kërkimit "Inrae", Thibault Datry tha për transmetuesin BFM se ata shohin "më shumë shkëmbinj sesa ujë" në lumenj.

"Të gjithë lumenjtë në Francë janë në nivele jashtëzakonisht të ulëta. Nuk ka ujë të mjaftueshëm për të siguruar lundrimin në lumenj", tha Datry.