Një avion luftarak Rafale i Forcave Ajrore të Kroacisë interceptoi të martën një avion pasagjerësh të regjistruar në Maltë mbi territorin kroat, pasi komanda ajrore e NATO-s e kishte identifikuar si një kërcënim të mundshëm, raportoi Croatia Week, duke e cituar Ministrinë kroate të Mbrojtjes.
Avioni Boeing po fluturonte nga Greqia drejt Gjermanisë kur Qendra e Operacioneve Ajrore të Kombinuara e NATO-s në Torrejon të Spanjës urdhëroi interceptimin e tij.
Informacionet nga Qendra e Komandimit dhe Raportimit në Itali treguan se avioni po transmetonte kodin 7500 të transponderit, i cili sinjalizon rrëmbimin e një avioni.
Avioni luftarak kroat e interceptoi avionin e pasagjerëve në orën 11:02, mbi Korenicë, në pjesën qendrore të Kroacisë.
Sipas raportimeve, piloti i avionit luftarak vendosi kontakt përmes radios me avionin e pasagjerëve, përpara se ta shoqëronte atë jashtë hapësirës ajrore kroate.
Avioni i pasagjerëve hyri në hapësirën ajrore të Sllovenisë në orën 11:20.
Që nga 1 janari, Kroacia kryen misione të patrullimit dhe mbrojtjes së hapësirës ajrore me avionë luftarakë Rafale, si pjesë e Sistemit të Integruar të Mbrojtjes Ajrore dhe Raketore të NATO-s.
