Presidenti ukrainas Volodymyr Zelenskyy tha sot se vendi i tij nuk ka marrë paralajmërim të hershëm nga partnerët e tij për sulmet ruse gjatë natës në kryeqytetin Kiev. 

Në një deklaratë në kompaninë amerikane të mediave sociale X, Zelenskyy pretendoi se mbi 100 armë të ndryshme u përdorën në sulmet gjatë natës nga Rusia, përfshirë raketa balistike, të cilat goditën infrastrukturën civile.

"Fatkeqësisht, nuk kemi marrë asnjë paralajmërim të hershëm nga partnerët tanë për këtë sulm. Inteligjenca për lëshimet e raketave balistike ruse ndihmon në shpëtimin e jetëve dhe kjo është një nga çështjet më kritike. Kjo është pikërisht ajo që ndihmon në parandalimin e vdekjes së njerëzve kur ka paralajmërim të hershëm për raketat balistike", tha Zelenskyy.

Duke komentuar një armëpushim energjetik midis Moskës dhe Kievit të shpallur nga presidenti amerikan Donald Trump, Zelenskyy tha se Ukraina nuk ka kryer sulme ndaj rafinerive ruse të naftës ose ndaj sektorit energjetik të vendit në përgjithësi për dy ditë që nga njoftimi.

"Por, Rusia nuk ia vuri veshin presidentit amerikan. Gjatë kësaj kohe, rusët kanë sulmuar si objektet tona energjetike ashtu edhe infrastrukturën tonë kritike, duke dërguar sinjale absolutisht të qarta se ata nuk kanë ndërmend të përmbahen nga sulmet ndaj Ukrainës", shtoi Zelenskyy.

Ai tha se gatishmëria e Ukrainës për "hapa reciproke drejt de-përshkallëzimit" nuk ka ndryshuar, duke argumentuar se presioni "efektiv" ndaj Rusisë nevojitet për de-përshkallëzimin dhe se luftërat përfundojnë "kur agresori të kuptojë se nuk mund ta zgjasë luftën".

"Presioni global mbi Rusinë kontribuon pikërisht në këtë - afrimin e paqes. Por, mbështetja direkte ose indirekte për Rusinë, ngadalësimi i ndihmës për Ukrainën dhe vështirësimi i mbrojtjes së jetëve kundër raketave balistike sigurisht që nuk do të ndihmojë në arritjen e paqes. Të gjithë kanë nevojë për paqe. Nevojitet një Amerikë e fortë, një Evropë e fortë dhe partnerë të fortë", shtoi ai.

Administrata Ushtarake e Qytetit të Kievit tha në një deklaratë të veçantë në Telegram se një person u plagos në një sulm që preku një ndërtesë banimi në lagjen Darnytskyi të kryeqytetit ndërsa Ukraina pretendoi se ka rrëzuar 88 nga 108 dronët e nisur nga Rusia gjatë natës.

Në një deklaratë, Forcat Ajrore të vendit shtuan se Moska lëshoi ​​pesë raketa balistike Iskander-M/S-400 kundër Ukrainës nga rajoni kufitar rus Bryansk. Ministri i Jashtëm ukrainas, Andrii Sybiha tha në një panel të Forumit të Sigurisë së Varshavës në Poloni se Kievi vazhdon të marrë të dhëna të inteligjencës nga ShBA-ja.

"Po, ne vazhdojmë këtë bashkëpunim (me palën amerikane). Dhe, gjithashtu, është e vërtetë se sulmi i djeshëm, ose sulmi i natës, alarmi i sulmit ajror u lëshua me vonesë. Por, është për shkak të llojit të veçantë të armatimit që u përdor nga pala ruse", tha Sybiha.

"Financial Times", duke cituar njerëz të njohur me këtë çështje, raportoi gjatë fundjavës se të dërguarit e SHBA-së, në bisedimet me homologët e tyre ukrainas të premten, ngritën mundësinë e ndërprerjes së shkëmbimit të inteligjencës në Kiev nëse ai nuk merrte parasysh paralajmërimin e Washingtonit për të ndalur sulmet energjetike në Rusi.