Shefat e inteligjencës evropiane kanë paralajmëruar se Rusia mund të intensifikojë operacionet e saj kundër vendeve të NATO-s në muajt e ardhshëm, përfshirë përmes sabotimeve, sulmeve me dronë dhe inkursioneve të kufizuara, sipas "The Guardian".

Kreu i Shërbimit të Informacionit të Sigurisë së Republikës Çeke, Michal Koudelka tha se skenarët e mundshëm përfshijnë një inkursion në shkallë të vogël në territorin e NATO-s, operacione nën flamur të rremë dhe fushata të gjera ndikimi. Ai paralajmëroi se zhvillime të tilla mund të ndodhin "brenda muajsh, jo vitesh", duke theksuar se po bëhen përpjekje për t’i parandaluar ato.

Megjithatë, kreu i Shërbimit Shtetëror të Sigurisë së Letonisë, Normunds Mezviets tha se nuk ka shenja për një sulm të afërt. Ai pranoi se Moska duket se po përgatitet për veprime më vendimtare në Evropë, por tha se mbetet e paqartë nëse kjo pasqyron plane konkrete ushtarake apo një përpjekje për të përhapur frikë dhe paqëndrueshmëri.

Mezviets tha se operacionet ruse po synojnë gjithnjë e më shumë rrjetet hekurudhore, infrastrukturën që mbështet Ukrainën dhe objektet e industrisë së mbrojtjes.

Shefi i inteligjencës ushtarake suedeze, Thomas Nilsson parashikon se aktivitetet ruse të sabotimit do të intensifikohen, duke e cilësuar incidentin e fundit me një dron të armatosur në aeroportin e Leipzigut në Gjermani si një "ndryshues të lojës".

Nilsson tha se sulmet që mund të shkaktojnë viktima ose të dëmtojnë rëndë infrastrukturën kritike do të përbënin një përshkallëzim të rëndësishëm. Zyrtarët e inteligjencës thanë se objektivat e Moskës përfshijnë dobësimin e mbështetjes evropiane për Ukrainën, krijimin e përçarjeve brenda NATO-s dhe alarmimin e opinionit publik.

Koudelka tha se qasja e Rusisë është të përshkallëzojë presionin me shpresën se vendet evropiane do të reduktojnë ndihmën e tyre për Kievin. Zëdhënësi i Kremlinit, Dmitry Peskov më herët hodhi poshtë pretendimet se Rusia synon të sulmojë NATO-n, duke thënë se spekulime të tilla nuk kanë lidhje me planet e Moskës.