Një mosmarrëveshje ka dalë në pah midis presidentit çek dhe qeverisë lidhur me atë se kush duhet ta përfaqësojë vendin në një samit të ardhshëm të NATO-s në Ankara, sipas mediave lokale.
Qeveria çeke ka bërë të ditur se presidenti Petr Pavel nuk duhet të marrë pjesë në samit, duke deklaruar se kryeministri Andrej Babish, së bashku me ministrin e mbrojtjes dhe atë të punëve të jashtme, do ta përfaqësojnë vendin në bisedime, raportoi të mërkurën Radio Prague International.
Mosmarrëveshja është më e fundit në një seri përplasjesh midis Pavelit dhe koalicionit qeverisës, me marrëdhënie të tensionuara për çështje që përfshijnë emërimet ministrore, shpenzimet e mbrojtjes dhe drejtimin e politikës së jashtme.
Pavel, i cili shërben si komandant i përgjithshëm i forcave të armatosura, ka mbrojtur qëndrimin e tij, duke argumentuar se kushtetuta i jep atij autoritetin për të përfaqësuar vendin jashtë.
Zyrtarët qeveritarë, megjithatë, këmbëngulin se politika e jashtme bie nën autoritetin e kabinetit dhe se vendimet për përfaqësimin ndërkombëtar i takojnë qeverisë. Ata gjithashtu theksuan se Republika Çeke nuk funksionon sipas një sistemi presidencial.
Babish argumentoi se pjesëmarrja e presidentit në samitet e mëparshme të NATO-s ka ndodhur në “rrethana standarde”, duke shtuar se kushtet aktuale kërkojnë përfaqësim të drejtpërdrejtë nga qeveria, veçanërisht për çështje strategjike dhe buxhetore.
Pavarësisht përplasjes, Pavel ka sinjalizuar gatishmëri për të kërkuar një kompromis.
Sipas raportimeve të mediave lokale, ai po shqyrton mundësinë që t’i bashkohet delegacionit në një rol të kufizuar, duke marrë pjesë potencialisht vetëm në seancat e rezervuara për krerët e shteteve.
“Ajo që ka rëndësi nuk është nëse dal fitues apo humbës në këtë, por çfarë mesazhi do të japë kjo për Republikën Çeke,” tha ai, duke paralajmëruar se përplasjet e brendshme mund të dëmtojnë pozitën ndërkombëtare të vendit.
Samiti i NATO-s në Ankara më 7-8 korrik pritet të fokusohet në sfidat kryesore të sigurisë me të cilat përballet aleanca, duke tërhequr vëmendje shtesë edhe mbi ndarjet e brendshme të Republikës Çeke.
