Sekretari i përgjithshëm i Këshillit të Kishave në Lindjen e Mesme (MECC), Michel Abs, tha se akti i një ushtari izraelit që vandalizoi një statujë që simbolizonte Jezu Krishtin në jug të Libanit "nuk ishte i papritur".
"Ne nuk e shohim këtë si sjellje të papritur ose të çuditshme, pasi ushtari në fjalë i përket një qeverie që pretendon se po zhvillon luftë të shenjtë bazuar në të ashtuquajturat tekste të shenjta", tha sot Abs në një përgjigje me shkrim për Anadolu në lidhje me incidentin në qytetin Deir Seryan, i cili mbetet nën pushtimin izraelit në jug të Libanit.
"Është e qartë se ai ndjen armiqësi ndaj simboleve të krishtera, por nuk është hera e parë që kanë ndodhur incidente të tilla. Shpresojmë me dyshim që të jetë hera e fundit", shtoi ai më tej.
Abs thekson rëndësinë e ndarjes së politikës nga feja, duke paralajmëruar se përdorimi i fesë në politikë, përfshirë në kohë lufte, përfaqëson një trend të rrezikshëm me pasoja të paparashikueshme.
Duke komentuar mbi raportet se qeveria izraelite kishte kërkuar falje për veprimet e ushtarit, Abs tha se një veprim i tillë ishte i nevojshëm për një qeveri që kërkon të portretizohet si e përkushtuar ndaj ligjit ndërkombëtar humanitar dhe të drejtave të njeriut, duke shtuar se ndërsa mund të jetë "një veprim i zgjuar, por nuk kundërbalancon një të kaluar me veprime të tmerrshme".
"Lufta është tregues i çmendurisë së njerëzimit", tha Abs duke shtuar se luftërat mund të shmangen duke promovuar një kulturë paqeje dhe dashurie në mbarë botën përmes luftimit të demonizimit dhe gjuhës së urrejtjes.
"Për ne, dashuria e Krishtit është ilaçi për njerëzimin e sëmurë", tha ai në deklaratë.
Fotografitë e shpërndara në mediat sociale treguan një ushtar izraelit duke përdorur një sëpatë për të shkatërruar statujën e Jezusit në Deir Seryan, e vendosur 5-6 kilometra nga kufiri në jug të Libanit.
Ushtria izraelite konfirmoi vërtetësinë e imazheve dhe njoftoi se ishte nisur një hetim. Nuk është dhënë asnjë informacion lidhur me kohën kur ndodhi incidenti ndërsa veprimet e ushtarit kundër simbolit fetar kanë shkaktuar reagime të gjera.
