Korpusi i Gardës Revolucionare Islamike të Iranit (IRGC) është zotuar se do ta bëjë Izraelin të “pendohet” nëse vazhdon sulmet ndaj Libanit, pavarësisht armëpushimit të përkohshëm mes Teheranit dhe Uashingtonit.

“Nëse sulmet ndaj Libanit nuk ndalen menjëherë, do të japim një përgjigje që do t’i bëjë agresorët pushtues në rajon të pendohen”, tha IRGC-ja në një deklaratë të transmetuar nga televizioni shtetëror.

Dje, Irani dhe ShBA-ja njoftuan një armëpushim dyjavor që synon të hapë rrugën për një marrëveshje përfundimtare për t’i dhënë fund luftës së nisur nga Uashingtoni dhe Tel Avivi kundër Teheranit më 28 shkurt, e cila ka lënë mijëra të vrarë dhe të plagosur.

Ndërmjetësuesit pakistanezë thanë se armëpushimi përfshin Libanin, ndërsa kryeministri izraelit, Benjamin Netanyahu, tha se nuk përfshihet. Hezbollah deri tani i është përmbajtur armëpushimit, pavarësisht sulmeve të vazhdueshme izraelite.

Sot, ushtria izraelite nisi një valë sulmesh vdekjeprurëse në të gjithë Libanin, sipas Mbrojtjes Civile libaneze, duke vrarë të paktën 254 persona dhe duke plagosur 1.165 të tjerë.

Izraeli ka kryer sulme ajrore dhe një ofensivë tokësore në jug të Libanit që nga një sulm ndërkufitar nga Hezbollahu më 2 mars, pavarësisht një armëpushimi që hyri në fuqi në nëntor 2024.