Portugalia ka ndaluar mbulimin e fytyrës në hapësirat publike, pasi presidenti António José Seguro nënshkroi një ligj të propozuar fillimisht nga partia e djathtë Chega.

Seguro e miratoi masën të martën, duke thënë se kjo trajtonte një çështje me “ndjeshmëri të madhe shoqërore dhe kulturore”, sipas një njoftimi të Pallatit Belém, selia e presidencës në Lisbonë.

Ai tha se ndryshimet e bëra gjatë procesit parlamentar e kishin bindur ta nënshkruante ligjin.

Në mbështetje të masës, Seguro përmendi integrimin shoqëror, mosdiskriminimin dhe sigurinë publike, si dhe vendimet e Gjykatës Evropiane për të Drejtat e Njeriut lidhur me mbulimin e fytyrës.

“Për presidentin e Republikës, fytyra e pambuluar përbën një element themelor të besimit shoqëror, karakteristikë e shoqërisë portugeze. Bashkëjetesa e përditshme mbështetet në njohjen e ndërsjellë dhe mundësinë e krijimit të një marrëdhënieje të drejtpërdrejtë mes njerëzve”, thuhet në deklaratë.

“Të pranosh se gratë, dhe vetëm gratë, duhet ta mbulojnë tërësisht fytyrën, nënkupton një pabarazi të papajtueshme me vlerat e barazisë dhe dinjitetit të barabartë mes burrave dhe grave, vlera mbi të cilat mbështeten demokracitë evropiane”, shtohet në deklaratë.

“Nga ana tjetër, në një shoqëri të lirë si e jona, çdo person duhet të jetë në gjendje ta jetojë identitetin dhe bindjet e veta brenda një tërësie rregullash të përbashkëta që mundësojnë ‘bashkëjetesën’, një koncept i pranuar nga Gjykata Evropiane për të Drejtat e Njeriut”, thuhet më tej.

Amnesty International Portugal e ka kritikuar ligjin si diskriminues, duke thënë se kërcënon të drejtat e grave myslimane që zgjedhin ta mbulojnë fytyrën.

Portugalia u bashkohet disa vendeve evropiane, përfshirë Francën, Belgjikën, Austrinë, Danimarkën dhe Holandën, të cilat kanë vendosur kufizime të plota ose të pjesshme për mbulimin e fytyrës në publik.