| Albanian
SPORT
2 minuta leximi
Sllovenia triumfon në Shkup, Maqedonia e Veriut mbyll Ligën e Kombeve me gjashtë humbje
Mysafirët kaluan në epërsi në minutën e 29-të përmes Danijel Sturm, i cili pas një aksioni individual arriti të mposhtë portierin Stole Dimitrievski me një goditje të saktë në këndin e sipërm të portës.
Sllovenia triumfon në Shkup, Maqedonia e Veriut mbyll Ligën e Kombeve me gjashtë humbje
Sllovenia triumfon në Shkup, Maqedonia e Veriut mbyll Ligën e Kombeve me gjashtë humbje / TRT Balkan AL

Përfaqësuesja e Maqedonisë së Veriut në futboll pësoi humbje 0-3 nga Sllovenia në shtëpi, në ndeshjen e fundit të Grupit B1 të Ligës së Kombeve të UEFA-s, duke përfunduar në vendin e fundit dhe duke rënë në Ligën C. 

Mysafirët kaluan në epërsi në minutën e 29-të përmes Danijel Sturm, i cili pas një aksioni individual arriti të mposhtë portierin Stole Dimitrievski me një goditje të saktë në këndin e sipërm të portës. Maqedonia e Veriut pati disa mundësi për të barazuar, por Enis Bardhi u ndal nga portieri Jan Oblak.

Në pjesën e dytë, vendasit shtuan presionin në kërkim të golit të barazimit. Ljupço Doriev pati dy raste për të shënuar, ndërsa edhe Bardhi u përpoq të mposhtte Oblakun, por portieri slloven reagoi me sukses.

Sllovenia e dyfishoi epërsinë në minutën e 66-të përmes David Zec, i cili shënoi nga afërsia pas një goditjeje nga këndi të ekzekutuar nga Zan Vipotnik, duke përfituar nga mungesa e mbulimit në mbrojtjen vendase.

Në minutat shtesë, Danijel Sturm shënoi golin e dytë personal dhe të tretin për Slloveninë, duke vulosur fitoren e mysafirëve dhe vendin e dytë në grup, që u siguron atyre pjesëmarrjen në ndeshjet e plejofit për ngjitje në Ligën A.

Me këtë humbje, Maqedonia e Veriut e mbyll fazën e grupeve pa asnjë pikë, pas gjashtë humbjeve në gjashtë ndeshje, duke pësuar gjithsej 15 gola. Kështu, përfaqësuesja rikthehet menjëherë në Ligën C.

BURIMI:TRT Balkan dhe Agjencitë