Ish-kryeministri i Izraelit, Naftali Bennett, ka akuzuar kryeministrin aktual Benjamin Netanyahu për “neglizhencë kriminale” lidhur me paralajmërimet përpara sulmit të 7 tetorit 2023, duke thënë se ai nuk paralajmëroi drejtuesit e sigurisë, nuk mblodhi kabinetin dhe nuk përgatiti vendin.

Bennett, i cili po sfidon Netanyahun në zgjedhjet e ardhshme, mbështeti një raport të Haaretz, sipas të cilit kryeministri kishte marrë një paralajmërim personal nga presidenti i Emirateve të Bashkuara Arabe, Mohamed bin Zayed, lidhur me planet e Hamasit, disa ditë përpara sulmit.

Në një postim në gjuhën hebraike në X, Bennett shkroi: “Raporti i mëngjesit të sotëm, sipas të cilit Netanyahu u paralajmërua dhjetë ditë para masakrës së 7 tetorit për qëllimet e Sinwarit: është i vërtetë”, duke iu referuar liderit të atëhershëm të Hamasit në Gaza, Yahya Sinwar.

“Netanyahu mban përgjegjësi personale dhe të drejtpërdrejtë për dështimin që çoi në vdekjen e mijëra izraelitëve gjatë kohës që ai ishte në detyrë”.

Bennett nuk shpjegoi se si e dinte se paralajmërimi i raportuar ishte i vërtetë.

“Ai nuk e përgatiti Izraelin për sulmin”

Sipas hetimit të Haaretz, lideri emiratas e paralajmëroi në mënyrë të qartë Netanyahun se Sinwari po planifikonte një operacion të madh kundër Izraelit.

Zyra e Netanyahut e mohoi raportin, duke thënë se ai as nuk kishte folur me presidentin e Emirateve të Bashkuara Arabe gjatë periudhës përkatëse dhe as nuk kishte marrë një paralajmërim të tillë, sipas Jerusalem Post.

Bennett tha se Netanyahu nuk kishte ndërmarrë hapat bazë në përgjigje të paralajmërimeve.

“Ai nuk shkoi në terren, nuk paralajmëroi drejtuesit e sistemit të sigurisë, nuk e përgatiti Izraelin për sulmin dhe nuk mblodhi kabinetin”, shkroi ai.

Në vend të kësaj, pretendoi Bennett, Netanyahu vazhdoi ta forconte Hamasin duke transferuar më shumë fonde dhe duke premtuar leje shtesë për punëtorët palestinezë, në përgjigje të presionit nga grupi.

Akuzon Netanyahun se pengon një hetim

Ai e akuzoi kryeministrin se po ndiqte “politikën e përmbajtjes dhe blerjes së qetësisë së përkohshme përmes nënshtrimit ndaj terrorit”, ndërsa shpërfillte paralajmërimet nga drejtuesit e sigurisë dhe liderët rajonalë.

“Netanyahu ishte aq i kapur pas konceptit të tij, saqë edhe paralajmërimet e qarta nga liderët rajonalë nuk e lëvizën nga karrigia e tij”, shkroi Bennett.

Ai gjithashtu akuzoi Netanyahun se po bllokon krijimin e një komisioni shtetëror hetimor, për të shmangur ekspozimin e përgjegjësisë së tij për dështimet që rrethuan sulmin.

“Netanyahu nuk mund të vazhdojë të shërbejë në detyrën e tij as edhe për një minutë tjetër dhe, sigurisht, ai nuk është i aftë ta korrigjojë këtë”, tha Bennett.

“Pas 50 ditësh, e gjithë kjo do të ndryshojë”

Duke i lidhur akuzat e tij me zgjedhjet e ardhshme, ai premtoi një qeveri që do t’i bashkonte izraelitët dhe do të krijonte një komision hetimor.

“Pas 50 ditësh, e gjithë kjo do të ndryshojë”, shkroi ai.

Bennett dhe ish-kryeministri tjetër Yair Lapid njoftuan në prill se do të garonin në zgjedhje në një listë të përbashkët të quajtur “Together” (“Së bashku”), të drejtuar nga Bennett.

Në prezantimin e saj, Bennett u zotua se vendimi i tij i parë, nëse zgjidhej, do të ishte krijimi i një komisioni zyrtar hetimor për 7 tetorin.

Ai gjithashtu premtoi të miratonte një ligj për “shërbim për të gjithë” dhe një kufizim tetëvjeçar të mandatit të kryeministrit, ndërsa tha se qeveria e tij do të mbështetej në një “shumicë sioniste” dhe nuk do të varej nga partitë arabe.

Sipas kuadrit kushtetues të Izraelit, një kryeministër mund të qëndrojë në detyrë pa një kufizim të përcaktuar të mandatit, për sa kohë që rizgjidhet në zgjedhje të njëpasnjëshme.