Të paktën shtatë ligjvënës myslimanë kanë fituar mandate në Kongresin amerikan, duke shënuar një përparim historik për përfaqësimin e myslimanëve si në Dhomën e Përfaqësuesve, ashtu edhe në Senat.

Zgjedhjet ndryshuan balancën e pushtetit në Uashington, pasi demokratët fituan kontrollin e të dy dhomave të Kongresit, Senatit dhe Dhomës së Përfaqësuesve, duke ia marrë shumicën republikanëve.

Të drejtat civile, shëndetësia dhe politika e jashtme ishin ndër temat kryesore të fushatave. Disa nga ligjvënësit e rinj dhe ata që siguruan rizgjedhjen zhvilluan fushata në mbështetje të standardeve ligjore ndërkombëtare, ndihmës humanitare dhe kundërshtimit të mbështetjes së pakushtëzuar ushtarake të ShBA-së për Izraelin, në kohën kur në Gaza po vazhdon gjenocidi.

Emrat historikë në Senat dhe Dhomën e Përfaqësuesve

Abdul El-Sayed

Kandidati 42-vjeçar demokrat mposhti ish-kongresistin republikan Mike Rogers, duke u bërë myslimani i parë i zgjedhur në Senatin amerikan.

Mjek dhe ish-zyrtar i shëndetit publik, El-Sayed fitoi mandatin e lënë të lirë nga senatori në largim Gary Peters, pas një fushate të tensionuar, gjatë së cilës përkatësia e tij fetare u bë objekt sulmesh nga republikanët dhe presidenti Donald Trump.

El-Sayed, i cili fitoi zgjedhjet paraprake të demokratëve në gusht, kritikoi dërgesat e pakushtëzuara të armëve amerikane për Izraelin dhe e cilësoi luftën në Gaza si gjenocid.

Ish-rivalja e tij në zgjedhjet paraprake, kongresistja Haley Stevens, mbështeti Rogersin dy ditë para zgjedhjeve të përgjithshme, për shkak të qëndrimit të El-Sayed ndaj Izraelit.

Adam Hamawy, New Jersey

Demokrati 56-vjeçar mposhti republikanin Gregg Mele në distriktin e 12-të zgjedhor të shtetit, duke u bërë myslimani i parë i zgjedhur për ta përfaqësuar New Jersey-n në Kongres.

Hamawy është kirurg plastik, ish-mjek ushtarak i ushtrisë amerikane dhe veteran i luftës në Irak. Në vitin 2024, ai doli vullnetar në Spitalin Evropian në Gaza.

Gjatë fushatës, ai u angazhua për sigurim shëndetësor universal Medicare, anulimin e borxheve mjekësore dhe studentore, shfuqizimin e Agjencisë së Imigracionit dhe Doganave (ICE), si dhe përfundimin e ndihmës ushtarake amerikane për Izraelin.

Darializa Avila Chevalier, Nju Jork

Demokratja siguroi një vend në Dhomën e Përfaqësuesve, pasi më herët kishte mposhtur në zgjedhjet paraprake të qershorit kongresistin veteran Adriano Espaillat.

Chevalier, hetuese e të drejtave civile, studente doktorature dhe e konvertuar në Islam, fitoi më shumë se 85 për qind të votave.

Fushata e saj u përqendrua te organizimi i komunitetit dhe mbrojtja e të drejtave të palestinezëve.

Ligjvënësit myslimanë që siguruan rizgjedhjen

Katër anëtarë myslimanë të Dhomës së Përfaqësuesve fituan sërish mandatet dyvjeçare, duke ruajtur rolin e tyre në debatet e Kongresit për politikën e jashtme dhe të drejtat e palestinezëve.

Rashida Tlaib, Miçigan

Demokratja me origjinë palestineze siguroi mandatin e pestë për përfaqësimin e distriktit të 12-të zgjedhor të shtetit, duke mposhtur republikanin James Hooper.

Tlaib është e vetmja anëtare e Kongresit me origjinë palestineze. Ajo ka mbrojtur zbatimin e rregullave vendore dhe ndërkombëtare për armët, mbrojtjen e civilëve dhe të drejtën e palestinezëve për vetëvendosje.

Ilhan Omar, Minnesota

Demokratja fitoi mandatin e pestë për përfaqësimin e distriktit të pestë zgjedhor të shtetit, duke mposhtur republikanin John Nagel dhe kandidatin e pavarur DeVelle Jackson.

Omar, e cila mbërriti në ShBA në moshën 12-vjeçare, u bë ligjvënësja e parë federale me origjinë somaleze në vend, kur mori detyrën në vitin 2019.

Ajo ka mbrojtur ndihmën humanitare dhe mbikëqyrjen e dërgesave të armëve amerikane, pavarësisht sulmeve të përsëritura politike për shkak të prejardhjes së saj.

Andre Carson, Indiana

Demokrati siguroi sërish mandatin në distriktin e shtatë zgjedhor, me qendër në Indianapolis, duke mposhtur republikanin Patrick McAuley dhe kandidatin libertarian James Sceniak.

Carson, i cili shërben në Kongres që nga viti 2008, është ligjvënësi mysliman me përvojën më të gjatë në Dhomën e Përfaqësuesve.

Qëndrimet e tij politike kanë vënë theksin te institucionet juridike ndërkombëtare, dinjiteti i barabartë njerëzor dhe ndihma humanitare.

Lateefah Simon, California

Demokratja siguroi sërish mandatin për përfaqësimin e distriktit të 12-të zgjedhor të shtetit, në zonën East Bay, duke mposhtur kandidaten demokrate Jamie Joyce.

Simon ka mbrojtur qëndrimin kundër dërgesave të armëve amerikane për qëllime sulmuese.

Ndërkohë, kandidatja myslimane Aisha Wahab ruajti epërsinë fillestare në një garë tjetër për Kongres në Kaliforni, ndërsa numërimi i votave vazhdonte.