Komisioni Qeveritar për Persona të Zhdukur ka bërë të ditur se janë identifikuar edhe tre viktima të zhdukjes me dhunë gjatë luftës, që i përkasin rastit të njohur si “Grupi i Intelektualëve” të cilët u gjetën në varret masive në Kalludër dhe Jabukë të Zubin Potokut. 

Komisioni njoftoi se pas pranimit të raporteve nga Komisioni Ndërkombëtar për Persona të Zhdukur, lidhur me identifikimet e reja, së bashku me Institutin për Mjekësi Ligjore dhe Drejtorinë e Policisë për Hetimin e Krimeve të Luftës-Sektorin për Persona të Zhdukur, ka zhvilluar takime me familjarët e viktimave të zhdukjes me dhunë për t'i njoftuar për identifikimet e reja.

“Janë identifikuar edhe tre viktima të zhdukjes me dhunë gjatë luftës, që i përkasin rastit të njohur si ‘Grupi i Intelektualëve’: Adem (Fazli) Ademi, Fatmir (Bajram) Fazlija, Ali (Islam) Haliti. Në këto momente të rënda, ndajmë dhimbjen me familjet dhe u shprehim ngushëllimet më të sinqerta”, thuhet në njoftimin e Komisionit.

Këto tre identifikime të reja i pasojnë tre identifikimet e mëparshme nga ky grup javë më parë ku u identifikuan eshtrat e Idriz Rrecaj, Adem Beqiri dhe Sali Mëziu.

Identifikimi i tyre u bë bazë të raporteve të ADN-së dhe vlerësimit të antropologut mjekoligjor.

Komisioni ka bërë të ditur se në vijim priten identifikime të tjera, për të cilat do të njoftohen fillimisht familjet përkatëse, duke respektuar të drejtën e tyre për të ditur fatin dhe vendndodhjen e më të dashurve të rrëmbyer e të zhdukur me dhunë, si dhe çdo kërkesë të drejtë të familjeve.

"Grupi i Intelektualëve të Mitrovicës" që përbëhej prej 23 personash, ishte zhdukur që nga prilli i vitit 1999, ndërsa në mesin e tyre kishte mjekë, profesorë, avokatë dhe profesionistë të tjerë.